Իտալական գրանդները կպայքարեն Մխիթարյանի տրանսֆերի համար

«Ինտերը» և «Միլանը» հետաքրքրված են «Ռոմայի» և Հայաստանի հավաքականի կիսապաշտպան Հենրիխ Մխիթարյանի ծառայություններով, այդ մասին հայտնում է Blastingnews-ը․ գրում է armsport-ը։

Ֆուտբոլային առաջիկա տրանսֆերային շուկայի ամենապահանջված խաղացողներից մեկը, անկասկած, Հենրիխ Մխիթարյանն է։ Հայ ֆուտբոլիստը կարող է հեռանալ Հռոմից և տեղափոխվել իտալական երկու առաջատար ակումբներից մեկը՝ «Ինտեր» կամ «Միլան»։ Ֆուտբոլիստի պայմանագիրն այս ամառ լրանում է, և մայրաքաղաքային ակումբը չի ծրագրում երկարաձգել այն։

Ըստ աղբյուրի՝ երկու ակումբներն էլ փնտրում են այնպիսի ֆուտբոլիստ, ով կարող է արագություն մտցնել կիսապաշտպանությունում, և հայ խաղացողը կարող է ճիշտ ձեռքբերում լինել, քանի որ նա ի վիճակի է խաղալ տարբեր դիրքերում կիսապաշտպանությունում՝ 3-5-2 և 4-2-3-1 սխեմաներում, և այդ պատճառով նա կհարմարվի Սիմոնե Ինձագիի և Ստեֆանո Պիոլիի մարտավարությանը։

Իր հերթին Fantamaster-ը գրում է, որ «Ռոման» դեռ չի կողմնորոշվել Մխիթարյանի ապագայի հարցում։ Պայմանագիրը, որը կապում է Մխիթարյանին թիմի հետ, ավարտվում է հունիսին, և մինչ այժմ խաղացողի գործակալի հետ հնարավոր երկարաձգման մասին որևէ խոսակցություն չի եղել: Հետևաբար, հնարավոր է, որ ամռանը հայ ֆուտբոլիստը կհեռանա Հռոմից։

Սակայն Blastingnews-ը ևս մեկ հետաքրքիր վարկած ունի․ «Ռոման», չի բացառվում, որ կփորձի երկարաձգել պայմանագիրը Հենրիխի հետ, որպեսզի վերջինս անվճար չհեռանա ակումբից։ Ֆուտբոլիստի ներկայիս տրանսֆերային արժեքը կազմում է 10 մլն եվրո։ Սակայն, ըստ աղբյուրի, այդ դեպքում ևս միլանյան գրանդները կշարունակեն փորձեր ձեռնարկել ձեռք բերել հայ ֆուտբոլիստի տրանսֆերը։ «Ինտերը» կարող է ֆուտբոլիստների փոխանակում առաջարկել, օրինակ՝ Ստեֆանո Սենսիի հետ, ով ներկայումս վարձավճարով հանդես է գալիս «Սամպդորիայում» և չի տեղավորվում Սիմոնե Ինձագիի ծրագրերի մեջ: «Միլանը» կարող է փորձել գործարքի մեջ ներառել Կրունիչի և Գաբբիայի տրանսֆերները։

Ավելի վաղ ռուսական և իտալական մամուլում լուրեր էին շրջանառվում, որ Մխիթարյանի ծառայություններով հետաքրքրված է Մոսկվայի «Դինամոն»։