16.09.2026 | 20:30
ՌԴ-ն նոր պատժամիջոցներ կկիրառի՝ հենց ՀՀ-ն որոշի ռազմաբազան հեռացնել․ Դավիթ Կարապետյան․ ՏԵՍԱՆՅՈՒԹ
ՌԴ Պետդուման վավերացրել է ինքնահռչակ Դոնեցկի և Լուգանսկի հանրապետությունների հետ համագործակցության համաձայնագրերը
Քաղաքականություն
22.02.2022 | 15:31
ՌԴ Պետդումայի պատգամավորները կողմ են քվեարկել Ուկրաինայի արևելքում ինքնահռչակ Դոնեցկի և Լուգանսկի հանրապետությունների հետ բարեկամության և համագործակցության պայմանագրերի վավերացմանը, որոնց ճանաչման մասին նախօրեին հայտարարել էր նախագահ Վլադիմիր Պուտինը, գրում է BBC-ի ռուսական ծառայությունը։
Պետդումայի պատգամավորները երկու համաձայնագրերն էլ միաձայն վավերացրել են․ կողմ է քվեարկել 400 պատգամավոր։ Պետդումայի անդամները բուռն ծափերով են ընդունել օրենքի հաստատումը։
Պատգամավորները, դարձյալ միաձայն, կողմ են քվեարկել երկու փաստաթղթերի՝ արագացված ուժի մեջ մտնելուն։ Դրանք պետք է ուժի մեջ մտնեն հրապարակման օրվանից, այսինքն՝ փետրվարի 22-ից։
Անհասկանալի է մնում, թե ինչ սահմաններում է Ռուսաստանը ճանաչում ինքնահռչակ այս հանրապետությունները։ Նրանք, ըստ իրենց Սահմանադրության, հավակնում են Ուկրաինայի Դոնեցկի և Լուգանսկի շրջանների ողջ տարածքին, սակայն իրականում վերահսկում են դրա միայն մի փոքր մասը։
Պուտինը նախօրեին հրամանագրեր է ստորագրել ինքնահռչակ Դոնեցկի և Լուգանսկի ժողովրդական հանրապետությունների անկախությունը ճանաչելու մասին։ Միաժամանակ, նա ՌԴ զինված ուժերին հանձնարարել է «ապահովել խաղաղության պահպանումը հանրապետություններում»։
ՌԴ նախագահը հանձնարարել է երկրի ԱԳՆ-ին՝ «բանակցություններ վարել Դոնեցկի և Լուգանսկի հանրապետությունների հետ դիվանագիտական հարաբերությունների հաստատման շուրջ»։
Տաթև Ֆռանգյան
