Պուտինի որոշման հետցնցումները․ ինչպես արձագանքեցին աշխարհն ու Հայաստանը

Ռուսաստանի նախագահ Վլադիմիր Պուտինը երեկ հայտարարեց, որ Դոնեցկի և Լուգանսկի ինքնահռչակ հանրապետությունների անկախությունն անհապաղ ճանաչելու գործընթաց է սկսում։ Այս մասին Պուտինն ասաց ՌԴ քաղաքացիներին ուղղված հեռուստաուղերձում։

Ի պատասխան՝ Եվրամիությունը հայտարարեց, որ սահմանափակող միջոցներ են կիրառելու, իսկ ԱՄՆ նախագահ Ջո Բայդենն էլ ստորագրել է Դոնեցկի և Դոնբասի նկատմամբ պատժամիջոցների մասին հրամանագիրը։

Պուտինի ելույթին կեսգիշերին հաջորդեց Ուկրաինայի նախագահ Վլադիմիր Զելենսկու ուղերձն ուկրաինացիներին։ Նախագահն ընդգծեց՝ Ուկրաինայի միջազգայնորեն ճանաչված սահմանները կմնան նույնը՝ չնայած Ռուսաստանի գործողություններին։

Պուտինի կողմից ճանաչմանն արձագանքել է Ուկրաինայում ԵԱՀԿ գործող նախագահի հատուկ ներկայացուցիչ և Դոնբասի հակամարտության կարգավորման կոնտակտային խմբում դեսպան Միկո Կիննունենը՝ հայտնելով իր «խորը ափսոսանքը» այս որոշման հետ կապված։ Նա շեշտել է՝ Լուգանսկի և Դոնեցկի անջատական մարզերի անկախությունը ճանաչելու որոշումը հակասում է Մինսկի պայմանավորվածություններին։

ՄԱԿ-ի գլխավոր քարտուղար Անտոնիո Գուտերեշն իր հերթին հայտարարել է, որ ուկրաինական Դոնեցկի և Լուգանսկի մարզերի անկախությունը ճանաչելու՝ Ռուսաստանի Դաշնության որոշումը չի համապատասխանում ՄԱԿ-ի կանոնադրության սկզբունքներին։ Նա կոչ է արել բոլոր ջանքերը կենտրոնացնել ռազմական գործողությունների անհապաղ դադարեցման, խաղաղ բնակիչների պաշտպանության և ցանկացած գործողությունների ու հայտարարությունների կանխարգելման ուղղությամբ։

ՌԴ նախագահի՝ երեկ կայացրած որոշումն այսօր Արցախի Հանրապետության իշխանությունների ու ժողովրդի անունից ողջունել է Արցախի նախագահ Արայիկ Հարությունյանը։ Նա շնորհավորել է Դոնբասի ժողովրդին, իր ձևակերպմամբ՝ «պատմական իրադարձության կապակցությամբ»։ Այնինչ հայաստանյան իշխանությունները դեռևս լռում են։

Մանրամասները՝ տեսանյութում։

Ռոզա Վարդանյան