08.06.2026 | 15:04
Համայնքապետերի ներկայությունից մինչև ընտրողների տեղափոխման դեպք․ «Ականատես»-ի արձանագրած խախտումները․ ՏԵՍԱՆՅՈՒԹ
Եվրահանձնաժողովի ղեկավարը սպառնում է «Ռուսաստանին կտրել» համաշխարհային շուկաներից
Քաղաքականություն
21.02.2022 | 16:12
Եվրահանձնաժողովի նախագահ Ուրսուլա ֆոն դեր Լյայենը մանրամասնել է արևմտյան պատժամիջոցները, որոնք սպառնում են Ռուսաստանին Ուկրաինայի վրա հարձակման դեպքում, և կրկին նախազգուշացրել ռուսական տնտեսության համար լայնածավալ հետևանքների մասին։ Այս մասին գրում է DW-ի ռուսական ծառայությունը։
ԵՄ-ի և ԱՄՆ-ի կողմից ծրագրված պատժամիջոցները կոչված են «էապես կտրելու Ռուսաստանին միջազգային ֆինանսական շուկաներից», ասել է ֆոն դեր Լյայենը գերմանական ARD հեռուստաալիքի եթերում։
«Տնտեսական առումով բոլոր պատժիչ միջոցները կկիրառվեն այն ապրանքների նկատմամբ, որոնք Ռուսաստանին խիստ անհրաժեշտ են՝ իր տնտեսությունը արդիականացնելու և դիվերսիֆիկացնելու համար, բայց որոնք արտադրվում են մեր կողմից, որոնց նկատմամբ մենք ունենք համաշխարհային առաջնորդություն, և որոնք Ռուսաստանը չի կարող փոխարինել»,- նշել է եվրոպացի պաշտոնյան։
Նա, սակայն, դեմ է արտահայտվել պատժամիջոցների անհապաղ սահմանմանը, ինչպես պահանջում է Ուկրաինան՝ կապված երկրի արևելքում բռնության վերջին սրացման հետ: Եվրահանձնաժողովի ղեկավարը նշել է, որ Արևմուտքը դեռ հնարավորություն է տալիս Ռուսաստանին վերադառնալ դիվանագիտությանը և նորից նստել բանակցությունների սեղանի շուրջ։
«Եվ այս հնարավորությունների պատուհանը դեռ բաց է»,- ընդգծել է եվրոպացի գործիչը։
Տաթև Ֆռանգյան
