19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
Դոնեցկում սկսել են բնակիչներին տարհանել ՌԴ
Քաղաքականություն
18.02.2022 | 19:59
Իրավիճակի սրման հետ կապված ինքնահռչակ Դոնեցկի ժողովրդական հանրապետությունում սկսել են տարհանել տեղի բնակիչներին։ Այս մասին հայտնել է ՌԻԱ Նովոստիի թղթակիցը։
«Այսօր՝ փետրվարի 18-ից, կազմակերպվում է բնակչության զանգվածային, կենտրոնացված տարհանում Ռուսաստանի Դաշնություն: Առաջին հերթին տարհանվում են կանայք, երեխաները և տարեցները»,- «Ինտերֆաքս»-ի հաղորդմամբ՝ այս մասին քաղաքացիներին ուղղված տեսաուղերձում հայտարարել է ԴԺՀ ղեկավար Դենիս Պուշիլինը։
Նա հավելել է, որ «Ռոստովի մարզում, Ռուսաստանի Դաշնության հետ պայմանավորվածության համաձայն, ամեն ինչ պատրաստ է քաղաքացիներին տեղավորելու համար»։
Սակայն ՌԴ նախագահի խոսնակ Դմիտրի Պեսկովը հայտարարել է, որ տեղեկություն չունի՝ ինչ է այժմ տեղի ունենում Դոնեցկում։
«Ես չգիտեմ, թե ինչ է կատարվում Պուշիլինի մոտ»,- ասել է Պեսկովը՝ լրագրողների խնդրանքով մեկնաբանելով կանանց, երեխաներին և տարեցներին Ռուսաստանի Ռոստովի մարզ տարհանելու վերաբերյալ ԴԺՀ ղեկավարի հայտարարությունը։
Նա հավելել է, որ տեղեկություն չունի նաև այն մասին՝ արդյո՞ք դա համաձայնեցված է եղել ռուսական կողմի հետ։ Բացի այդ, Պեսկովն անպատասխան է թողել հարցը՝ արդյո՞ք Ռուսաստանը պատրաստ է ընդունել փախստականներին։
«Չգիտեմ՝ ում հետ է եղել կապը, տեղեկություն չունեմ»,- ասել է Կրեմլի խոսնակը։
Հավելենք, որ Պուշիլինի հայտարարությունից հետո բնակչությանը Ռուսաստան տարհանելու կոչ է արել նաև ինքնահռչակ Լուգանսկի ժողովրդական հանրապետության ղեկավար Լեոնիդ Պասեչնիկը։
Նշենք, որ ըստ ուկրաինական օպերատիվ շտաբի տվյալների՝ Դոնբասում հրետակոծությունների ինտենսիվությունն աճում է. այսօր ժամը 14:00-ին գրանցվել է անջատողականների կողմից հրադադարի ռեժիմի խախտման 45 դեպք, մինչդեռ անցած օրվա ընթացքում գրանցվել է 60 խախտում։ Նշվում է, որ հրետակոծության ընթացքում հակառակորդը կրակել է 122 մմ հրանոթներից, 82 և 120 մմ ականանետերից, ծանր գնդացիրներից, ավտոմատ մոլբերտ և մոլբերտ հակատանկային նռնականետերից, ԲՄՊ-2 զինատեսակներից և հրաձգային զինատեսակներից։
Հիշեցնենք՝ երեկվա հրետակոծության հետևանքով վիրավորվել էր երկու զինվորական և հինգ քաղաքացիական անձ։
Ուկրաինայի արևելքում հակամարտությունը շարունակվում է գրեթե ութ տարի, այդ ընթացքում, ըստ ՄԱԿ-ի տվյալների, զոհվել է ավելի քան 13 հազար մարդ, ևս մոտ 44 հազարը՝ վիրավորվել։
