ԵՐԵՎԱՆԻ ԺԱՄԱՆԱԿՈՎ. Իշխանությունն ու ընդդիմությունը, ինչպես թատրոնում, պայմանավորվում և խաղում են մեկ սցենար. Սուրեն Շահվերդյան. ՏԵՍԱՆՅՈՒԹ

«Այնպիսի տպավորություն ունեմ, որ Ազգային ժողովում ներկայացված քաղաքական ուժերը` իշխանությունն ու ընդդիմությունը, ինչպես թատրոնում, պայմանավորվում և խաղում են մեկ սցենար: Այսօր նրանց միջև լուրջ պայքար չեմ տեսնում»,- Factor TV-ի հետ զրույցում նման տեսակետ է հայտնում բեմադրիչ և ռեժիսոր Սուրեն Շահվերդյանը:

Նրա խոսքով` միգուցե, այդ ուժերի միջև կա գաղափարական տարբերություն, սակայն ժամանակը ցույց է տալիս, որ բոլորն էլ կատարում են այն, ինչ թելադրում է Ռուսաստանը: Խոսելով ներքաղաքական ճգնաժամի, մեր ժողովրդի հոգեբանական վիճակի մասին` Սուրեն Շահվերդյանը նկատում է, որ 2018-ից հետո բացի պատերազմը ամենասարսափելի բանը, որ տեղի ունեցավ մեզ հետ այն էր, որ մարդիկ վերջնականապես կոտրվեցին և կորցրին հավատը.

«Այսօր մարդիկ դժվարությամբ դուրս կգան փողոց պայքարի. նրանք ձանձրացել են: Նրանք որևէ ղեկավարի խոսքից չհասկացան` ինչ է առաջարկվում, վաղը ինչ է լինելու: Բացի այդ, մեր հասարակությունը գնում է այն առաջնորդի հետևից, որն ավելի հետաքրքիր է ստում, և չի գնում նրա հետևից, ով ասում է դառը ճշմարտությունը: Եթե մոտ ապագայում ընտրություն լինի, մեր ժողովուրդն էլի կգնա ականջ շոյող ստի հետևից»:

Սուրեն Շահվերդյանն անդրադառնում է նաև վերջին շրջանում մի շարք մտավորականների հանդիպմանը նախագահի լիազորությունները կատարող Ալեն Սիմոնյանի հետ և տեսակետ հայտնում, թե ինչու հանրության մի ստվար հատված քննադատեց մտավորականների այդ քայլը.

«Եթե նրանք գնային նախագահի մոտ և բարձրացնեին հանրությանը հուզող հարցեր, պատկերը լիովին այլ կլիներ: Ինձ համար այդ մարդկանց շրջանում կան շատ հարգելի արվեստագետներ, ուղղակի այն, որ նրանք գնացել էին պարզապես ճաշելու Ալեն Սիմոնյանի հետ, դա բողոքի մեծ ալիք բարձրացրեց, ժողովուրդն ասաց` գնացել-հասել էիք այնտեղ, հրատապ հարցե´ր բարձրացնեիք»:

Մանրամասները` տեսանյութում:

Աննա Բաբաջանյան