17.01.2026 | 20:00
ՔՆՆԱՐԿՈՒՄ․ ՀՀ-ն ինչպե՞ս է կատարել ԵՄ-ի հետ CEPA համաձայնագիրը․ մշտադիտարկման արդյունքներ
Թուրքիան ռազմական պատրաստվածության վիճակում է և սպառնում է պատերազմով. Հունաստանի ԱԳ նախարար
Քաղաքականություն
18.02.2022 | 19:16
Թուրքիան շարունակում է հավակնել Հունաստանի հետ վիճելի որոշ կղզիների և գտնվում է մարտական պատրաստվածության վիճակում․ պատերազմի վտանգ կա։ Այս մասին հայտարարել է Հունաստանի արտգործնախարար Նիկոս Դենդիասը Մոսկվայում ռուս գործընկեր Սերգեյ Լավրովի հետ բանակցություններից հետո կայացած ճեպազրույցի ժամանակ:
«Սա միակ երկիրն է մոլորակի վրա, որը հանդես է գալիս մեկ այլ երկրի դեմ պատերազմ հայտարարելու օգտին, այն բանի համար, որ այդ երկիրը (այսինքն՝ Հունաստանը) կատարում է իր պարտավորությունները՝ հիմնված ծովի միջազգային իրավունքի՝ 68 երկրների կողմից ստորագրված փաստաթղթի հիման վրա»,- ասել է Դենդիասը, փոխանցում է ՌԻԱ Նովոստին:
Հույն նախարարը Թուրքիային մեղադրել է «ագրեսիվ և ապակայունացնող վարքագիծը շարունակելու մեջ»։
«Միգուցե Թուրքիան օգտվում է այն հանգամանքից, որ բոլորի ուշադրությունն ուղղվել է այլ ուղղությամբ, և առաջ է քաշում Հունաստանի ինքնիշխանությանն անիրատեսական ու անօրինական պահանջներ»,- ասել է Հունաստանի ԱԳՆ ղեկավարը։
Միաժամանակ, Դենդիասն ընդգծել է, որ Հունաստանը խստորեն հետևելու է իր քաղաքականությանը և հանդես կգա միջազգային իրավունքի վրա հիմնված կառուցողական երկխոսության օգտին։
Տաթև Ֆռանգյան
