Աքարը վերահաստատել է Թուրքիայի դիրքորոշումը․ Անկարան կարևորում է Վրաստանի և Ուկրաինայի տարածքային ամբողջականությունը

Թուրքիան գործադրում է բոլոր ջանքերը՝ Սևծովյան տարածաշրջանում լարվածությունը նվազեցնելու համար․ տարածաշրջանում բոլոր տարաձայնությունները պետք է լուծվեն բանակցությունների և դիվանագիտության միջոցով։ Այս մասին Բրյուսելում հայտարարել է Թուրքիայի պաշտպանության նախարար Հուլուսի Աքարը թուրք լրագրողների հետ զրույցում, գրում է «Անադոլու» գործակալությունը։

Նշենք, որ Աքարը Բրյուսելում է՝ մասնակցելու ՆԱՏՕ-ի պաշտպանության նախարարների երկօրյա հանդիպմանը։

«Մենք կարևորում ենք Վրաստանի և Ուկրաինայի տարածքային ամբողջականությունն ու ինքնիշխանությունը։ Ինչպես ասել է նախագահ Ռեջեփ Թայիփ Էրդողանը՝ Անկարան արել և անում է հնարավոր ամեն ինչ՝ լարվածության մակարդակը նվազեցնելու համար»,- ասել է Աքարը։

Խոսելով ռուս-ուկրաինական լարվածության մասին՝ Աքարը նշել է, որ Թուրքիան առաջին իսկ օրից բարձր մակարդակով իր հստակ դիրքորոշումն է հայտնել այդ հարցի շուրջ։

«Մենք առաջին օրից դեմ ենք հանդես եկել Ղրիմի օկուպացիային։ Մենք նաև ասել ենք, որ աջակցում ենք Ուկրաինայի տարածքային ամբողջականությանը և շարունակում ենք մնալ նույն դիրքում։ Մենք հանդես ենք գալիս ողջախոհ և հավասարակշռված մոտեցման օգտին՝ տարածաշրջանում լարվածության կարգավորման համար։ Մենք անկեղծորեն ցանկանում ենք, որ Սևծովյան տարածաշրջանի երկրները լինեն խաղաղության, երկխոսության, հանգստության ու բարգավաճման մեջ»,- ասել է Թուրքիայի ՊՆ ղեկավարը։

Նա նշել է, որ Անկարան դեմ է Սև ծովում հետագա էսկալացիային։

«Գործընկերների հետ զրույցներում մենք շեշտում ենք, որ պետք է խուսափել արմատական հռետորաբանությունից կամ հայտարարություններից, որոնք կարող են հանգեցնել լարվածության աճի։ Որևէ գործողություն կատարելուց կամ հայտարարություններ անելուց առաջ անհրաժեշտ է մանրամասն խորհրդակցել գործընկերների հետ»,- ասել է Հուլուսի Աքարը։

Էմմա Չոբանյան