21.08.2026 | 22:51
Մարմնամարզիկ Արթուր Ավետիսյանը՝ Եվրոպայի չեմպիոն
ԱՄՆ-ը F-35-եր է տեղակայել Գերմանիայում
Քաղաքականություն
17.02.2022 | 18:21
ԱՄՆ-ը Գերմանիա է ուղարկել հինգերորդ սերնդի F-35 բազմաֆունկցիոնալ կործանիչներ՝ ՆԱՏՕ-ի պաշտպանությունն ուժեղացնելու համար։ Այս մասին երեկ հայտարարել է ԱՄՆ ռազմաօդային ուժերի պահեստային հրամանատարությունը։
Գործող 388-րդ և պահեստային 419-րդ ավիացիոն ստորաբաժանումների կործանիչները տեղափոխվել են Շպանգդալեմ ավիաբազա՝ օդաչուների ու սպասարկող անձնակազմի հետ միասին։ Նշվում է, որ F-35 A Lightning II-ը ամենաժամանակակից կործանիչներն են ԱՄՆ ռազմաօդային ուժերում, որոնք ունակ են իրականացնել տարատեսակ խնդիրներ ագրեսիայի զսպման ու դաշնակիցների պաշտպանության համար, եթե զսպումը չհաջողվի»։
«ԱՄՆ կործանիչների տեղակայումը Շպանգալեմի ավիաբազայում ուժեղացնում է ՆԱՏՕ-ի պաշտպանությունը և համատեղ գործելու մեր կարողությունը։ Մենք գործ ունենք դինամիկ միջավայրի հետ, և այս տեղակայումը մեծապես ուժեղացնում է ՆԱՏՕ-ն»,- ասել է ԱՄՆ ռազմաօդային ուժերի հրամանատար Ջեֆ Հարիգանը:
Նշվում է նաև, որ ԱՄՆ-ն 8 F-15E է ուղարկել Լեհաստան, իսկ վեց KC-135 Stratotanker տանկեր՝ Գերմանիայի Ռամշտեյն ավիաբազա։
Նախօրեին հաղորդվել էր, որ Ուկրաինայի վրայով ԱԹՍ-ներ և ամերիկյան հետախուզական ինքնաթիռներ են թռչում։ Այսպիսով, RQ-4A Global Hawk ռազմավարական անօդաչու թռչող սարքը պտույտներ է կատարել Կիևի և Դոնբասի միջև, իսկ Boeing RC-135V Rivet Joint ինքնաթիռը թռել է Ղրիմի հարակից տարածքներում։
Տաթև Ֆռանգյան
