18.12.2025 | 23:24
ՀՀ տարածքում ավտոճանապարհները հիմնականում անցանելի են
Ուկրաինայի սահմանից ռուսական զորքերի հետքաշում չի նկատվում․ Բայդեն-Շոլց զրույցի մանրամասները
Քաղաքականություն
17.02.2022 | 14:04
Ռուսական զորքերի զգալի դուրսբերում Ուկրաինայի հետ սահմաններից դեռևս չի նկատվել, պահանջվում է «վերջնական զգոնություն»։ Նման եզրահանգման են եկել ԱՄՆ նախագահ Ջո Բայդենը և Գերմանիայի կանցլեր Օլաֆ Շոլցը փետրվարի 16-ին կայացած հեռախոսազրույցի ժամանակ, գրում է DW-ի ռուսական ծառայությունը։
Այսպիսով, Ուկրաինա ռուսական ներխուժման սպառնալիքը դեռևս պահպանվում է։ Երկու ղեկավարներն էլ համակարծիք են եղել, որ իրավիճակը տարածաշրջանում չափազանց լուրջ է, ասել է Գերմանիայի կառավարության խոսնակ Շտեֆեն Հեբեստրեյթը։
Բայդենն ու Շոլցը ողջունել են Ռուսաստանի նախագահ Վլադիմիր Պուտինի հայտարարությունները՝ ճգնաժամից դուրս գալու համար դիվանագիտական ջանքերը շարունակելու անհրաժեշտության մասին։ Միևնույն ժամանակ, Գերմանիայի կանցլերն ու ԱՄՆ նախագահը նշել են, որ կարևոր է կառուցողական երկխոսության մեջ մտնել եվրոպական անվտանգության հարցերի, Մինսկի պայմանավորվածությունների կատարման և Գերմանիայի ու Ֆրանսիայի աջակցությամբ «նորմանդական ձևաչափով» բանակցություններում առաջընթացի հասնելու համար։
«Ճգնաժամի լուծման բանալին Մոսկվայում է»,- բանակցությունների ժամանակ ընդգծել են Օլաֆ Շոլցը և Ջո Բայդենը՝ նշելով, որ Ռուսաստանը պետք է «իրական քայլեր» ձեռնարկի լարվածության թուլացման համար։ Նրանք Կրեմլին նախազգուշացրել են Ուկրաինայի տարածքային ամբողջականության և ինքնիշխանության դեմ հետագա ռազմական ագրեսիայի մասին, որի դեպքում Ռուսաստանը պետք է բախվի «ծայրահեղ ծանր» հետևանքների։
Տաթև Ֆռանգյան
