10.10.2026 | 14:28
ԵՄ-ն շնորհավորել է Երևանի 2808-ամյակը
Մեծ Բրիտանիայից և ԱՄՆ-ից հայտնել են դեպի Ուկրաինայի սահման ռուսական նոր զորքերի տեղափոխման մասին
Քաղաքականություն
17.02.2022 | 12:59
Չնայած ուկրաինական սահմաններից զորքերի դուրսբերման մասին Մոսկվայի հայտարարություններին՝ Ռուսաստանը շարունակում է ռազմական ուժեր կուտակել տարածաշրջանում։ Այս մասին հայտարարել են բրիտանական ռազմական հետախուզության ղեկավար Ջիմ Հոքենհոլը և Սպիտակ տան անանուն բարձրաստիճան պաշտոնյան, գրում է DW-ի ռուսական ծառայությունը։
«Մենք ապացույցներ չենք տեսել, որ Ռուսաստանը դուրս է բերել իր զորքերը Ուկրաինայի սահմաններից»,- ասել է Հոքենհոլը։
Ընդհակառակը, բրիտանական հետախուզության տվյալներով՝ Ուկրաինայի ուղղությամբ են շարժվում լրացուցիչ զրահատեխնիկա, ուղղաթիռներ, նկատվել է նաև դաշտային հոսպիտալ։
«Ռուսաստանն ունի ռազմական հնարավորություններ Ուկրաինա ներխուժելու համար»,- հավելել է պաշտոնյան։
Ըստ ամերիկյան աղբյուրների՝ Կրեմլը ևս 7000 զինվոր է տեղակայել ուկրաինական սահմանի մոտակայքում։ Սպիտակ տան խոսնակը «սուտ» է անվանել զորքերի մի մասի դուրսբերման մասին ՌԴ իշխանությունների հայտարարությունները։ Նա նաև վստահեցրել է, որ Ռուսաստանը «ցանկացած պահի» կարող է սկսել գործողություն, որը պատրվակ կծառայի Ուկրաինա ներխուժելու համար։
«Ռուսաստանն ասում է, որ ցանկանում է դիվանագիտական լուծում գտնել, սակայն նրա գործողություններն այլ բան են ասում»,- ընդգծել են Սպիտակ տնից։
Այն, որ Ռուսաստանը փորձում է Դոնբասում «ցեղասպանության» և «զանգվածային գերեզմանների» չհիմնավորված պնդումների միջոցով պատրվակ ստեղծել Ուկրաինա ներխուժելու համար, հայտարարել է նաև ԱՄՆ Պետքարտուղարության խոսնակ Նեդ Փրայսը։
«Վերջին մի քանի շաբաթվա ընթացքում մենք տեսել ենք, որ ռուս պաշտոնյաները և լրատվամիջոցները բազմաթիվ պատմություններ են նետում, որոնցից յուրաքանչյուրը կարող է ներխուժման պատրվակ ծառայել»,- ասել է Փրայսը՝ ընդգծելով, որ այս պնդումներից և ոչ մեկը իրական հիմք չունի:
Տաթև Ֆռանգյան
