18.12.2025 | 19:26
Պապիկյանը ՆԱՏՕ-ի գլխավոր քարտուղարի տեղակալի հետ քննարկել է գործընկերության ընթացքը և զարգացման հեռանկարները
Իսրայելի նախագահը Թուրքիա մեկնելուց առաջ նախ կայցելի Հունաստան և Կիպրոս
Քաղաքականություն
16.02.2022 | 17:06
Իսրայելի նախագահ Իսաակ Հերցոգը հաջորդ երկու շաբաթների ընթացքում, նախքան Թուրքիա մեկնելն ու նախագահ Ռեջեփ Թայիփ Էրդողանի հետ բանակցություններ անցկացնելը, կմեկնի Հունաստան և Կիպրոս։ Այս մասին գրում է «Ահվալ»-ը՝ վկայակոչելով The Jerusalem Post-ը։
«Ուղևորությունները կոչված են հավաստիացնելու Աթենքին և Նիկոսիային, որ Անկարայի հետ մերձեցումը տեղի չի ունենա այն սերտ կապերի հաշվին, որոնք Իսրայելը զարգացրել է նրանց հետ վերջին տարիներին»,- ասվում է հրապարակման մեջ։
Նշվում է, որ Հերցոգի մեկօրյա այցը Աթենք նախատեսվում է հաջորդ հինգշաբթի, իսկ Կիպրոս այցը կկայանա հաջորդ շաբաթ։
Նախօրեին հայտնի դարձավ, որ Թուրքիա Հերցոգի այցին ընդառաջ՝ փետրվարի 16-17-ը Իսրայելում կլինի թուրքական պատվիրակությունը, որը գլխավորելու են նախագահ Ռեջեփ Թայիփ Էրդողանի արտաքին քաղաքական հարցերով գլխավոր խորհրդական Իբրահիմ Քալընը, ԱԳ փոխնախարար Սեդաթ Օնալը։ Պաշտոնյաները հանդիպելու են նաև Պաղեստինի իշխանությունների հետ:
Հավելենք, որ ավելի վաղ իսրայելական մամուլը տեղեկություններ էր տարածել, որ Իսրայելի ԱԳՆ բարձրաստիճան պաշտոնյան նախորդ ամիս գաղտնի այցելել է Թուրքիա՝ նախագահ Հերցոգի այցի նախապատրաստման շրջանակում։
Էմմա Չոբանյան
