17.01.2026 | 20:00
ՔՆՆԱՐԿՈՒՄ․ ՀՀ-ն ինչպե՞ս է կատարել ԵՄ-ի հետ CEPA համաձայնագիրը․ մշտադիտարկման արդյունքներ
ՆԱՏՕ-ն դեռևս չի տեսնում Ուկրաինայի հետ սահմաններից ռուսական զորքերի դուրսբերման նշաններ․ Ստոլտենբերգ
Քաղաքականություն
16.02.2022 | 16:31
ՆԱՏՕ-ի գլխավոր քարտուղար Յենս Ստոլտենբերգը հայտարարել է, որ Դաշինքը մինչ այժմ չի տեսնում Ուկրաինայի սահմաններից ռուսական զորքերի դուրսբերման նշաններ, ինչը կվկայեր լարվածությունը նվազեցնելու Մոսկվայի իրական մտադրության մասին։ Ավելի վաղ ՌԴ իշխանությունները հայտարարել էին, որ զորավարժություններից հետո կազմավորումների մի մասը վերադառնում է մշտական տեղակայման վայրեր, նրանք նաև խոսել են Արևմուտքի հետ ունեցած տարաձայնությունները դիվանագիտական ճանապարհով լուծելու մտադրության մասին, հաղորդում է BBC-ի ռուսական ծառայությունը։
«Մենք Մոսկվայից ազդանշաններ ենք լսել, որ նա պատրաստ է շարունակել դիվանագիտական ջանքերը, բայց մինչ այժմ մենք տեղում չենք տեսել լարվածության ապաէսկալացիա։ Հակառակը, կարծես Ռուսաստանը շարունակում է զարգացնել իր ռազմական ներուժը»,- ասել է Ստոլտենբերգը:
«Ինտերֆաքս»-ի փոխանցմամբ՝ Ստոլտենբերգին ի պատասխան՝ ՌԴ նախագահի խոսնակ Դմիտրի Պեսկովն ասել է. «ՆԱՏՕ-ում գործերի վիճակի գնահատման համակարգում առկա է որոշակի, հավանաբար, արատ, ինչը, անշուշտ, թույլ չի տալիս ՆԱՏՕ-ի ներկայացուցիչներին սթափ գնահատել իրավիճակը»։
Ավելի վաղ Մոսկվան հայտարարել էր, որ Բելառուսի զինվորականների հետ համատեղ զորավարժություններին մասնակցող արևմտյան և հարավային ռազմական շրջանների ստորաբաժանումները երեքշաբթի սկսել են վերադառնալ իրենց ռազմական կայազորներ։
Տաթև Ֆռանգյան
