14.12.2024 | 19:57
Ինչ իրավիճակ է ճանապարհներին 19։35-ի դրությամբ
ԵՄ-ն ռեկորդային ծավալներով հեղուկ գազ է գնել՝ մատակարարումների հնարավոր խափանմանը դիմակայելու համար
Քաղաքականություն
16.02.2022 | 14:09
ԵՄ-ն ձեռնարկել է լայնածավալ նախազգուշական միջոցներ, եթե ռուսական գազի մատակարարումը Եվրոպա դադարեցվի։ Այս մասին Ստրասբուրգում լրագրողներին հայտնել է Եվրահանձնաժողովի (ԵՀ) նախագահ Ուրսուլա ֆոն դեր Լյայենը, գրում է DW-ի ռուսական ծառայությունը՝ վկայակոչելով dpa գործակալությունը։
Մատակարարման խափանումների ռիսկը նվազեցնելու համար Եվրահանձնաժողովը վերջին ամիսներին բանակցություններ է վարել բնական հեղուկ գազի հիմնական արտահանողների՝ ԱՄՆ-ի, Կատարի և Եգիպտոսի հետ՝ հեղուկ գազի ծավալները մեծացնելու համար:
Բացի այդ, խորհրդակցություններ են անցկացվել բնական հեղուկ գազի հիմնական ներկրողների, մասնավորապես՝ Ճապոնիայի և Հարավային Կորեայի հետ՝ ԵՄ-ին սեփական պաշարներից հումք տրամադրելու համար։ Եվրահանձնաժողովի ղեկավարը նշել է, որ հունվարին Բրյուսելի այս ջանքերի արդյունքում ԵՄ-ն ներկրել է ռեկորդային՝ տասը տրիլիոն խորանարդ մետր հեղուկ գազ։
Եվրոպայում գազի գնի նկատելի աճը սկսվել է 2021 թվականի գարնանը, երբ TTF ինդեքսի միջին սփոթային գինը տատանվում էր 250-300 դոլարի սահմաններում՝ 1000 խմ-ի դիմաց։ Ամռան վերջին օրերին «օր առաջ» առաքմամբ պայմանագրի արժեքը հատել է 600 դոլարի շեմը, իսկ հոկտեմբերի սկզբին այն գերազանցել է 1000 դոլարը։ Դեկտեմբերին գնանշումները կրկնապատկվել են՝ հասնելով 2190 դոլարի՝ պատմական առավելագույնին:
Մինչ այժմ Եվրոպան նման բարձր գներ չի ունեցել գազային հանգույցների պատմության մեջ, որոնցից առաջինը՝ բրիտանական NBP-ն, ստեղծվել է 1996 թվականին։
Ուրսուլա ֆոն դեր Լյայենը փետրվարի սկզբին նշել է, որ Եվրոպայի գազի ավելի քան 40 տոկոսը գալիս է Ռուսաստանից, որը ներկայում, կարծես թե, «չունի շահագրգռվածություն ավելացնել մատակարարումները՝ չնայած բարձր գներին և շտապ պահանջարկին»:
Տաթև Ֆռանգյան
