16.09.2026 | 18:46
ՀՀ-ն է որոշումներ կայացնելու TRIPP մուտք ու ելքի պահին. Փաշինյան. ՏԵՍԱՆՅՈՒԹ
Եվրոպական անվտանգությունը կարող է կառուցվել միայն ՌԴ-ի հետ․ Շոլցը՝ Պուտինի հետ մոսկովյան հանդիպումից հետո
Քաղաքականություն
15.02.2022 | 19:41
Կրեմլում ավարտվել են Ռուսաստանի նախագահ Վլադիմիր Պուտինի և Գերմանիայի կանցլեր Օլաֆ Շոլցի բանակցությունները Կրեմլում։ Զրույցը տևել է ավելի քան երեք ժամ։
ՌԻԱ Նովոստիի հաղորդմամբ՝ ՌԴ ղեկավարը նշել է, որ զրույցն անցել է գործնական մթնոլորտում, բոլոր հարցերը քննարկվել են «առարկայական և հանգամանալից»։ Նրա խոսքով՝ կանցլերը հավատարիմ է Մոսկվայի հետ պրագմատիկ երկկողմ համագործակցությանը։
«Պարոն Շոլցը որպես Գերմանիայի կառավարության ղեկավար առաջին անգամ է այցելում Ռուսաստան, սակայն Համբուրգը ղեկավարելու ժամանակաշրջանում, մասնավորապես, մեծապես նպաստել է Սանկտ Պետերբուրգի հետ գործընկերային հարաբերությունների զարգացմանը և, ի դեպ, այս հարաբերություններն այս տարի արդեն 65 տարեկան են»,- հավելել է ՌԴ նախագահը։
Իր հերթին, Օլաֆ Շոլցը կոչ է արել «անպայման խուսափել» Ուկրաինայի և Ռուսաստանի միջև հակամարտության հետագա սրումից: Սա է Մոսկվա այցի, ինչպես նաև նախօրեին Կիևում կայացած բանակցությունների հիմնական նպատակը, գրում է DW-ի ռուսական ծառայությունը։
Շոլցն ընդգծել է, որ գերմանացիների և բոլոր եվրոպացիների համար պարզ է, որ եվրոպական անվտանգությունը չի կարող կառուցվել Ռուսաստանի դեմ, այլ միայն Ռուսաստանի հետ։
«Անհրաժեշտ է բոլոր միջոցներով կանխել Եվրոպայում ռազմական էսկալացիայի վերսկսումը»,- նշել է գերմանացի պաշտոնյան։
Տաթև Ֆռանգյան
