Թուրք բարձրաստիճան պաշտոնյաներ են մեկնում Իսրայել՝ նախագահ Հերցոգի Անկարա այցին ընդառաջ

Թուրքիայի բարձրաստիճան պաշտոնյաների պատվիրակությունը մեկնելու է Իսրայել՝ այդ երկրի նախագահ Իսաակ Հերցոգի՝ Անկարա կատարելիք այցին ընդառաջ։ Այս մասին հայտնում է Թուրքիայի ԱԳՆ-ն, փոխանցում է Reuters գործակալությունը՝ նշելով, որ տարածաշրջանային երկու հակառակորդ պետությունները փորձում են կապերը վերականգնել երկարատև թշնամությունից հետո։

Հաղորդվում է, որ թուրքական պատվիրակությունը, որն Իսրայելում կլինի փետրվարի 16-17-ը, գլխավորելու են նախագահ Ռեջեփ Թայիփ Էրդողանի արտաքին քաղաքական հարցերով գլխավոր խորհրդական Իբրահիմ Քալընը, ԱԳ փոխնախարար Սեդաթ Օնալը։ Նշվում է, որ պաշտոնյաները կհանդիպեն նաև Պաղեստինի իշխանությունների հետ:

Հավելենք, որ ավելի վաղ իսրայելական մամուլը տեղեկություններ էր տարածել, որ Իսրայելի ԱԳՆ բարձրաստիճան պաշտոնյան նախորդ ամիս գաղտնի այցելել է Թուրքիա՝ նախագահ Հերցոգի այցի նախապատրաստման շրջանակում։

Իսրայելը և Թուրքիան 2018 թվականին փոխադարձաբար արտաքսել են դեսպաններին, հարաբերությունները շարունակում են լարված մնալ։ Անկարան, սակայն, աշխատում է շտկել լարված հարաբերությունները տարածաշրջանի մի քանի երկրների հետ։

Իսրայելի նախագահականն ու ԱԳՆ-ն հայտնում են, որ Քալընը և Օնալն այցելում են Հերցոգի նախատեսված այցը համակարգելու և դեկտեմբերին Թուրքիայում կայացած քննարկումներից հետո պաշտոնյաների հետ բանակցություններ վարելու համար:

Ակնկալվում է, որ թուրքական պատվիրակությունը հանդիպելու է նաև Պաղեստինի պաշտոնյաների, այդ թվում՝ նախագահ Մահմուդ Աբբասի հետ։

Թուրքական մամուլը հայտնում է, որ Իսրայելի նախագահ Հերցոգի այցը Թուրքիա նախատեսվում է մարտի 9-10-ը։

Էմմա Չոբանյան