10.10.2026 | 10:44
«Կտրվի Ամուլսարի հանքավայրի շահագործման մեկնարկը»․ Փաշինյան
ՌԴ զորքերի հետքաշումն ապաէսկալացիա չի նշանակում․ ՆԱՏՕ
Քաղաքականություն
15.02.2022 | 18:11
ՆԱՏՕ-ն ստեղծված իրավիճակում «զգուշավոր լավատեսություն» է դրսևորել Ռուսաստանի հետ անվտանգության շուրջ բանակցություններում, սակայն Ուկրաինայի շուրջ ապաէսկալացիայի նշաններ դեռևս չկան։ Այս մասին այսօր հայտարարել է ՆԱՏՕ-ի գլխավոր քարտուղար Յենս Ստոլտենբերգը, գրում է Korrespondent-ը։
«Մոսկվայից ազդանշաններ կան, որ դիվանագիտական ջանքերը պետք է շարունակվեն: Սա զգուշավոր լավատեսության հիմք է տալիս»,- ասել է նա։
Միևնույն ժամանակ, նա նշել է, որ տվյալներ չկան, որոնք վկայում են Ռուսաստանի Դաշնության կողմից անմիջապես տեղում ապաէսկալացիայի մասին։
«Առայժմ մենք տեղում ապաէսկալացիայի որևէ ապացույց չենք տեսել»,- ասել է Ստոլտենբերգը։
Նա հիշեցրել է, որ ավելի վաղ ռուս զինվորականներն արդեն լքել էին Ուկրաինայի մերձակայքում գտնվող դիրքերը, սակայն այնտեղ թողել էին զինտեխնիկա, որի շնորհիվ, անհրաժեշտության դեպքում, զորքերը կկարողանային արագ վերադառնալ սահման։
«Զորքերի տեղաշարժն ինքնին չի նշանակում իրական ապաէսկալացիա»,- ասել է ՆԱՏՕ-ի գլխավոր քարտուղարը՝ հավելելով, որ ապաէսկալացիայի համար Ռուսաստանի Դաշնությունը պետք է դուրս բերի նաև ծանր զինտեխնիկայի զգալի մասը։
Ստոլտենբերգը հայտարարել է նաև Ռուսաստանի հետ համագործակցության և երկխոսության՝ ՆԱՏՕ-ի պատրաստակամության մասին։
«Հունվարի 26-ին ես Ռուսաստանին հրավիրել եմ մի շարք հանդիպումների Ռուսաստան-ՆԱՏՕ խորհրդի շրջանակում, մենք ուղարկել ենք հստակ առաջարկներ հիմնական օրակարգով, որպեսզի լսենք Ռուսաստանին հուզող հարցերը, կիսվենք այն հարցերով, որոնք մեզ են հուզում, և ընդհանուր լեզու գտնենք»,- ասել է նա։
ՆԱՏՕ-ի գլխավոր քարտուղարը հիշեցրել է, որ դաշինքը պատրաստ է քննարկել Ռուսաստանի հետ հարաբերությունները, Եվրոպայում անվտանգությունը, ներառյալ՝ իրավիճակը Ուկրաինայում, ռիսկերի նվազեցումը, թափանցիկությունը և սպառազինությունների վերահսկումը, բայց չի գնա զիջումների հիմնական սկզբունքների հարցում, ինչպիսիք են յուրաքանչյուր ազգի իրավունքն ընտրելու իր ուղին։
Հիշեցնենք՝ այսօր ավելի վաղ ՌԴ Պաշտպանության նախարարությունը հայտնել էր, որ Արևմտյան և Հարավային ռազմական շրջանների ստորաբաժանումները զորավարժություններից սկսում են վերադառնալ իրենց հենակետեր։
Տաթև Ֆռանգյան
