10.10.2026 | 10:44
«Կտրվի Ամուլսարի հանքավայրի շահագործման մեկնարկը»․ Փաշինյան
Օլաֆ Շոլցը հրաժարվել է Պուտինի հետ հանդիպումից առաջ ռուս բժիշկներին ՊՇՌ թեստ հանձնել
Քաղաքականություն
15.02.2022 | 17:12
Գերմանիայի կանցլեր Օլաֆ Շոլցը մերժել է ՌԴ նախագահ Վլադիմիր Պուտինի հետ հանդիպելուց առաջ կորոնավիրուսի թեստ հանձնելու՝ ռուսական կողմի առաջարկը։ Փոխարենը, նա նախընտրել է Մոսկվայում Գերմանիայի դեսպանատան գերմանացի բժշկի կողմից ՊՇՌ թեստավորումը, որն անհրաժեշտ է Կրեմլ մուտք գործելու համար, գրում է DW-ի ռուսական ծառայությունը:
Կանցլերի մերձավորները հայտնել են, որ գերմանական կողմը հրավիրել է Ռուսաստանի առողջապահական ոլորտի ներկայացուցիչներին՝ մասնակցելու Շոլցի թեստավորմանը։ Թեստավորման համար անհրաժեշտ ողջ փաթեթը բերվել է Գերմանիայից։ Նշվում է, որ Շոլցը, նրա պատվիրակության անդամներն ու ուղեկցող լրագրողները, ընդհանուր առմամբ, 50 հոգի, մինչ Գերմանիայից մեկնելը երեք ՊՇՌ թեստ են հանձնել։
Մի քանի օր առաջ Ֆրանսիայի նախագահ Էմանուել Մակրոնը ևս Մոսկվա այցի շրջանակում հրաժարվել էր ռուսական ՊՇՌ թեստից։ Արդյունքում երկու քաղաքական գործիչներն էլ, այսպես կոչված, սոցիալական հեռավորությունը պահպանելու համար բանակցությունների նստեցին վեց մետրանոց սեղանի հակառակ ծայրերում։
Հավելենք, որ Օլաֆ Շոլցն այսօր առավոտյան ժամանել է Մոսկվա՝ Պուտինի հետ դռնփակ բանակցություններ անցկացնելու։ Ուշադրության կենտրոնում է լինելու Ուկրաինայի շուրջ ստեղծված ճգնաժամը։ Միացյալ Նահանգները վերջին օրերին բազմիցս զգուշացրել է Ուկրաինա ռուսական զորքերի մոտալուտ ներխուժման մասին։ Ռուսաստանը հերքում է այս պնդումները։
Տաթև Ֆռանգյան
