18.12.2025 | 23:24
ՀՀ տարածքում ավտոճանապարհները հիմնականում անցանելի են
Մեծ Բրիտանիայում Ուկրաինայի դեսպանը հայտարարել է, որ Կիևը կարող է հրաժարվել ՆԱՏՕ-ին անդամակցությունից
Քաղաքականություն
14.02.2022 | 15:57
Ուկրաինան կարող է հրաժարվել ՆԱՏՕ-ին անդամակցությունից՝ Ռուսաստանի հետ պատերազմից խուսափելու համար։ BBC ռադիոկայանին տված հարցազրույցում այս մասին ասել է Մեծ Բրիտանիայում Ուկրաինայի դեսպան Վադիմ Պրիստայկոն, փոխանցում է DW-ի ռուսական ծառայությունը։
Հաղորդավարի հարցին՝ արդյո՞ք Ուկրաինան կարող է նման քայլի գնալ հանուն խաղաղության, Պրիստայկոն պատասխանել է, որ Կիևին վաղուց են մղում նման որոշման, այդ թվում՝ «ՆԱՏՕ-ից ձայները»:
«40 միլիոնանոց երկիրն ինքն իրեն հարց է տալիս՝ ինչպե՞ս կարող ենք գոյատևել, եթե նրանք (Ռուսաստանը) հարձակվեն վաղը։ Կկարողանա՞նք լիցքաթափել ստեղծված իրավիճակը՝ մնալով անպաշտպան և ոչ մի դաշինքի մաս, երբ մեր բոլոր ընկերներն ու հարևաններն արդեն կազմակերպության անդամ են»,- հետաքրքրվել է դիվանագետը։
Այնուհետ լրագրողը խնդրել է Ուկրաինայի դեսպանին ուղիղ պատասխանել հարցին, թե հնարավո՞ր է՝ Կիևը հրաժարվի ՆԱՏՕ-ի անդամությունից՝ «պատերազմից խուսափելու համար», ինչին Պրիստայկոն արձագանքել է. «Մենք կկարողանայինք դա անել, հատկապես մեզ դրան մղելու սպառնալիքի ներքո: Մենք ճկուն ենք լավագույն ելքը գտնելու հարցում, եթե ստիպված լինենք որևէ լուրջ զիջման գնալ, դա այն է, ինչ մենք կարող ենք անել»:
Կիևը, սակայն, արդեն հերքել է ուկրաինացի դիվանագետի այս պնդումները։ Ուկրաինայի նախագահի խոսնակ Սերգեյ Նիկիֆորովը հայտարարել է, որ Կիևի համար առաջնահերթություն է մնում ՆԱՏՕ-ին և Եվրամիությանն ինտեգրվելու ուղին։
Տաթև Ֆռանգյան
