29.06.2026 | 00:59
ԱԱ-2026. Վերջին վայրկյաններին հաղթական գոլ` փլեյ-օֆֆի մեկնարկային խաղում. ՏԵՍԱՆՅՈՒԹ
Իտալիան հազար զինծառայող կուղարկի Արևելյան Եվրոպա՝ ՆԱՏՕ-ի արևելյան թևն ուժեղացնելու համար
Քաղաքականություն
14.02.2022 | 15:23
Իտալիան ծրագրում է ուժեղացնել ՆԱՏՕ-ի ներկայությունը Արևելյան Եվրոպայում՝ հազար զինծառայող ուղարկելով Հունգարիա կամ Բուլղարիա։ Այս մասին գրում է La Repubblica պարբերականը՝ հղում անելով սեփական աղբյուրներին։
Որոշումն ընդունվել է եվրոպական մի շարք երկրների նմանատիպ նախաձեռնություններին համահունչ։ Նշվում է, որ այդ մասին կհայտարարվի փետրվարի 16-ին և 17-ին Բրյուսելում կայանալիք նախարարների հանդիպման ժամանակ, որտեղ Իտալիան կներկայացնի պաշտպանության նախարար Լորենցո Գուերինին։ Ի վերջո, զինվորականների գործուղումը պետք է հաստատվի Իտալիայի խորհրդարանի պալատների կողմից։
Իտալական զորախումբը ներկայացված կլինի մեքենայացված հետևակի ստորաբաժանումներով (մոտոհրաձգային զորքեր): Մինչև անցյալ տարվա կեսերը այդ զինծառայողները մասնակցել են Աֆղանստանում ՆԱՏՕ-ի առաքելությանը, իսկ նրանցից ոմանք այժմ դաշինքի ստորաբաժանումների մաս են կազմում Կոսովոյում։
La Repubblica-ի փոխանցմամբ՝ ստորաբաժանումները կզբաղվեն ուսումնական աշխատանքներով, հատկապես՝ համատեղ վարժանքներով ՆԱՏՕ-ի հարավարևելյան սահմանին։ La Stampa թերթը, սակայն, նշում է, որ Հունգարիայում իտալացի զինվորականների տեղակայումը դաշինքի օդային տարածքը պարեկելու աշխատանքի մի մասն է։
Տաթև Ֆռանգյան
