Հնդկաստանում ուսանողները զանգվածային բողոքի ցույցեր են իրականացնում՝ հիջաբ կրելու արգելքի պատճառով․ եղել են բախումներ

Հնդկաստանի Կարնատակա նահանգում ուսումնական հաստատությունները ժամանակավորապես փակվել են հիջաբ կրելու արգելքից հետո զանգվածային բողոքի ցույցերի բռնկման պատճառով։ Այս մասին հայտնում է The Guardian-ը։
Հունվարին վեց մահմեդական ուսանողներ մեկշաբաթյա բողոքի ցույց են անցկացրել այն բանից հետո, երբ ուսումնական հաստատությունում նրանց արգելել են հիջաբ կրել:

Անցյալ շաբաթ նահանգի այլ քոլեջներ ևս սկսեցին արգելել հիջաբն այն բանից հետո, երբ որոշ հինդու ուսանողներ սկսեցին պահանջել, որ իրենց թույլատրվի կրել ավանդական զաֆրանի գույնի շալեր:

Շաբաթ օրը Կարնատակա նահանգի իշխանությունները հրամայել են քոլեջներին միջոցներ ձեռնարկել, որպեսզի ուսանողները չկրեն «հավասարությունը և հասարակական կարգը խախտող հագուստ»:

Մուսուլման ուսանողները հայտարարել են, որ ոտնահարվում է կրոնի ազատության իրավունքը և դիմել են նահանգի Գերագույն դատարան։

Ուսանողները պնդում են, որ որոշ քոլեջներում «կրոնական ապարտեիդ» է իրականացվում, որտեղ հիջաբ կրող կանանց թույլատրվում է սովորել, սակայն նրանց դասավանդում են առանձին դասարաններում:

Որոշ քոլեջներում մահմեդական ուսանողները ենթարկվել են ագրեսիվ հարձակման: Որոշ վայրերում ուսանողների միջև բախումները վերաճել են բռնության, ոստիկանները ուժ են կիրառել և օդ կրակել։

Երեքշաբթի օրը նահանգի գլխավոր նախարար Բասավարաջ Ս. Բոմմայը երեք օրով դադարեցրել է դպրոցների և քոլեջների աշխատանքը և կոչ արել ուսանողներին և ուսուցիչներին պահպանել խաղաղություն և ներդաշնակություն:

Տաթև Ֆռանգյան