21.08.2026 | 22:51
Մարմնամարզիկ Արթուր Ավետիսյանը՝ Եվրոպայի չեմպիոն
Էրդողանն իրեն վիրավորելու համար բանտարկված լրագրողին դատի է տվել՝ պահանջելով 250,000 լիրա փոխհատուցում
Քաղաքականություն
09.02.2022 | 22:56
Թուրքիայի նախագահ Ռեջեփ Թայիփ Էրդողանը դատական հայց է ներկայացրել բանտարկված թուրք հայտնի հեռուստալրագրող Սեդեֆ Քաբաշի ու TELE1 հեռուստաալիքի տնօրենների խորհրդի նախագահ Ֆըրաթ Սաքարի դեմ, գրում են թուրքական լրատվամիջոցները։ Էրդողանը պահանջում , որպես ոչ նյութական վնասի փոխհատուցում 250,000 լիրա (շուրջ 18,000 դոլար) վճարել։
Նշենք, որ հայտնի լրագրող Քաբաշը հունվարի 22-ին էր ձերբակալվել Էրդողանին վիրավորելու համար։
Քաբաշը, մասնավորապես, հեռուստաեթերում և թվիթերյան գրառմամբ ասել էր․ «Եզը կարող է իր ճանապարհը գտնել դեպի պալատ, սակայն դա նրան թագավոր չի դարձնում։ Սա, սակայն, պալատն է վերածում գոմի»։ Ավելի ուշ լրագրողն ասել էր, որ իր խոսքերն ասացվածք են, և նախագահին վիրավորելու մտադրություն չի ունեցել։
Նախագահի փաստաբանների կողմից Ստամբուլի դատարան ներկայացված միջնորդության մեջ ասվում է, որ Քաբաշը «չափազանց դաժան վիրավորանք, հարձակում և զրպարտություն է արել Ռեջեփ Թայիփ Էրդողանի պատվի, արժանապատվության դեմ՝ նրա անձի իրավունքները ոտնձգելու մտադրությամբ»։
Նշվում է նաև, որ Ֆըրաթ Սաքար էլ իրավական պատասխանատվություն է կրում Մամուլի մասին օրենքի 13-րդ հոդվածի համաձայն։
«Մինչ Սեսեֆ Քաբաշը բանտում իր մեղադրական եզրակացությանն է սպասում, նրան Էրդողանի կողմից իր դեմ 250,000 լիրայի հայցի մասին են ծանուցել»,-թվիթերյան իր էջում գրել է փաստաբան Ուգյուր Փոյրազը։
Հավելենք, որ տարբեր գործիչներ հանդես են եկել Քաբաշին ազատ արձակելու կոչով։ Լրագրողի բանտարկմանն անդրադարձել էր նաև ԱՄՆ պետքարտուղարությունը։
Էմմա Չոբանյան
