«Կարո՞ղ է զբոսաշրջիկին մի հատ էլ առաջարկենք՝ սգո սրահ այցելի»․ կփակվեն Գյումրու կենտրոնում գործող սգո սրահները․ ԼՈւՍԱՆԿԱՐՆԵՐ

Գյումրու կենտրոնական հատվածում՝ Շառլ Ազնավուրի հրապարակում և Շիրակացի փողոցում՝ Շիրակի մարզային քննչական վարչության հարևանությամբ գործող սգո սրահները կփակվեն։  Դրանք չեն համապատասխանում  Գյումրու համայնքապետարանի կողմից տարեվերջին սահմանած չափորոշիչներին։ 

Համայնքապետարանը թե՛ բանավոր և թե՛ գրավոր ծանուցումներ է ուղարկել  տերերին ու ժամանակ տվել՝  կամ ազատել տարածքները, կամ դրանք վերակազմավորել և օգտագործել այլ նպատակով (խանութ և այլն)։ Այս մասին տեղեկացրեց Գյումրու համայնքապետարանի գլխավոր ճարտարապետ Հենրիկ Գասպարյանը։ Ըստ ճարտարապետի, սգո սրահները ոչ միայն տեղաբաշխվածությամբ, այլև շենքերի կառուցվածքով  չեն համապատասխանում  սահմանված  նորմերին։ Նա Factor.am-ի հետ զրույցում ասաց, որ  Գյումրու համայնքապետարանի կողմից սահմանվել են շենք-շինություններին ներկայացվող չափորոշիչները, թե որ շենքերը կարող են օգտագործվել որպես սգո սրահներ և որտեղ կարող են դրանք տեղաբաշխված լինել։

«Չափորոշիչների համաձայն, կենտրոնում չեն կարող գործել սգո սրահներ, դրանք  հասարակական վայրերից, բնակելի տներից, դպրոցներից պետք է լինեն նվազագույնը 100 մետր հեռավորության վրա։  Եթե 100 մետրը չի ապահովվում, պարտադիր պետք է լինի բնակիչների համաձայնությունը։ Ըստ չափորոշիչների, սգո սրահներում սառնարաններ պետք է լինեն, սենյակներ, ավտոմեքենաների կայանման տեղեր, ամեն «բուդկա» չեն կարող դնել ու դարձնել սգո սրահ։ Հետո, դրանք չպիտի երևան որպես առաջին գիծ, այսինքն՝ չպիտի լինեն փողոցի վրա, տեսանելի վայրում, թաքնված վայրերում պետք է լինեն։ Իսկ մեր մատնանշած սգո սրահները  ցուցադրական վայրերում են՝ Շիրակի մարզային քննչական վարչության հարևանությամբ, մյուսն էլ Շառլ Ազնավուրի հրապարակում է՝ Բարեկամության այգու մոտ է։ Ի՞նչ եք կարծում , եթե վաղը Բարեկամության այգին կառուցեն, զբոսաշրջիկն  այգում ման գալուց հետո մի հատ էլ պիտի գնա սգո սրա՞հը նայի»,-ասաց ճարտարապետը։ 

Հենրիկ Գասպարյանի փաստմամբ, բազմաթիվ բողոքներ են ստացել քաղաքացիներից վերոհիշյալ  սգո սրահների՝ տվյալ տեղանքներում  գործելու հետ կապված։ 

 «Դրանք անհարմարություններ են ստեղծում բնակիչների համար, սգո սրահները պիտի քաղաքի ծայրամասերում գործեն։ Միանշանակ արգելելու ենք դրանց գործունեությունը, խելամիտ ժամանակ կտրամադրենք այլ վայր տեղափոխելու համար », -հավելեց Գյումրու քաղաքապետ Վարդգես Սամսոնյանը։ 

Արմիկ Մովսիսյան