Քաղաքականություն
08.02.2022 | 17:34«Բոլորս վրդովված ենք Բելառուսի նախագահի հնչեցրած խոսքերից, բայց գուցե փորձենք հասկանալ դրա պատճառները»,- Ազգային ժողովում հայտարարությունների ժամին այս մասին նշեց «Պատիվ ունեմ» խմբակցության քարտուղար Հայկ Մամիջանյանը։
Ընդդիմադիր պատգամավորի խոսքով՝ Բելառուսի նախագահն իր հարցազրույցներում իրեն թույլ է տվել արտահայտություններ, որոնք անընդունելի է համարում։
«Հայաստանը գնալու տեղ ունի, ավելին՝ Հայաստանը հստակ նպատակներ ունի, Հայաստանը շարունակելու է մնալ Եվրոպան ու Ասիան կապող աշխարհաքաղաքական հանգույց, Հայաստանն ու Արցախը եղել են ու շարունակելու են մնալ քրիստոնյա աշխարհի դարպասը, Հայաստանը շարունակելու է լինել Արցախի ժողովրդի արդար ինքնորոշման երաշխավորն ու աջակիցը, մեր երկիրը ոտքի է կանգնելու ու մաքրվելու է կապիտուլյացիայի ու դրա պատճառը հանդիսացող խմբակին վերընտրելու խայտառակ խարանից:
Մեր երկիրը հմուտ դիվանագիտության միջոցով և դրան ուժ տվող արհեստավարժ զինված ուժերի գոյությամբ վերականգնելու է արդարությունը տարածաշրջանում։ Բայց այս ամենը տեղի է ունենալու միայն այն ժամանակ, երբ մեր երկրի կառավարչի միջազգային հարաբերությունների զինանոցը չսահմանափակվի, իբր, պարզաբանում պահանջող, իսկ իրականում «լայքեր» մուրացող հայացքով»,-հայտարարեց Հայկ Մամիջանյանը:
Պատգամավորը հիշեցրեց՝ այս ամբիոնից բազմաթիվ անգամներ պահանջել է, որ ՀՀ ԱԳՆ-ն արձագանքի Ալիևի, Էրդողանի լկտի արտահայտություններին: «Բայց այսօր, ծանոթանալով Բելառուսի նախագահի հարցազրույցի արձագանքին, հասկացա, որ ավելի լավ է չարձագանքեր»։
Մամիջանյանը կոչով դիմեց նաև Բելառուսի նախագահ Ալեքսանդր Լուկաշենկոյին. «Ալեքսանդր Գրիգորիի, մի՛ նույնականացրեք Հայաստանն ու Նիկոլ Փաշինյանին և երբեք չկարծեք, որ Հայաստանի հետ կարող եք խոսել այն նույն ձևով, ինչպես խոսում եք Փաշինյանի հետ»։
Մանրամասները՝ տեսանյութում:
