Էրդողանի խոսնակը հայտարարել է՝ Թուրքիան միակ երկիրն է, որ կարող է միջնորդի դեր ստանձնել ՌԴ-ի ու Ուկրաինայի միջև

ՌԴ նախագահ Վլադիմիր Պուտինի նպատակն, իմ կարծիքով, ոչ թե Ուկրաինան է, այլ Արևմուտքի հետ առևտուրը։ Ստեղծված իրավիճակում շատ կարևոր է հենց ՌԴ-ի ու Ուկրաինայի առաջնորդների դիրքորոշումը, որոնք կարող են նվազեցնել առճակատման ինտենսիվությունը, իսկ Թուրքիայի նախագահը կարող է օգնել՝ կատարելով միջնորդի արդյունավետ դեր։ Այս մասին Թուրքիայի նախագահի խոսնակ Իբրահիմ Քալընը հայտարարել է A Haber հեռուստաալիքին տված հարցազրույցում , գրում է Անադոլու գործակալությունը։

Նրա խոսքով, Թուրքիայի ղեկավարի վերջին այցը Կիև տեղի է ունեցել տարածաշրջանի համար վճռորոշ ժամանակաշրջանում։

«Ուկրաինայում Էրդողանի այցը ընդունել են շատ դրական։ Նման դիրքորոշում ունի նաև ՆԱՏՕ-ն։ Նախագահ Էրդողանը Կիևում շատ հավասարակշռված հայտարարություններ է արել՝ կողմերին երկխոսության կոչ անելով։ Կարծում եմ՝ չափազանցություն չի լինի ասել, որ Թուրքիան միակ երկիրն է, որը կարող է միջնորդի դեր կատարել ստեղծված իրավիճակում։ Նույն Պուտինի հետ Արևմուտքի առաջնորդների շփումները բոլորովին այլ բնույթ են կրում»,-ասել է Քալընը։

Նա նշել է, որ հենց Ուկրաինայում բացահայտ կերպով անհանգստացած են ՌԴ մոտալուտ ագրեսիայի վերաբերյալ Արևմուտքի պնդումներից։

«Ցանկացած պատերազմ ռիսկ և բեռ է, որը պետք է հնարավորինս հաշվարկել, այդ թվում՝ քաղաքական և տնտեսական հարթության վրա։ Շատ կաևոր է ձգտել նվազեցնել լարվածություը ու պատասխանել մի պարզ հարցի՝ ինչպիսի՞ն է լինելու աշխարհաքաղաքական դասավորությունը Սառը պատերազմի ավարտից 30 տարի անց։ ՌԴ նախագահի նպատակը իմ կարծիքով ՝Ուկրաինան չէ, այլ սակարկումը Արևմուտքի, հատկապես՝ ԱՄՆ-ի ու ՆԱՏՕ-ի հետ։ ՌԴ-ի ու Արևմուտքի առճակատման ֆոնին շատ կարևոր է Թուրքիայի դիրքորոշումը»,-ասել է Թուրքիայի նախագահի խոսնակը։

Քալընը նաև հայտարարել է, որ եթե ՌԴ նախագահի Թուրիքա այցի արդյունքներով կողմերն ընդունեն նախագահ էրդողանի առաջարկությունը միջնորդության վերաբերյալ, ապա Սևծովյան տարածաշրջանի համար վատագույն սցենարները մոռացության կմատնվեն։

Էմմա Չոբանյան