«Անթույլատրելի են պետական հեղաշրջման փորձերը»․ ՀՀԿ. ՏԵՍԱՆՅՈՒԹ

Վահրամ Բաղդասարյանը նորմալ քաղաքական պրոցես է համարում «1500 հոգու բողոքի գործողությունները փողոցում»։

«Բնականաբար իրենք քաղաքացիների մի մասնիկն են և այդ ամենը պետք է անեն հիմնավորված»,- ասում է պարոն Բաղդասարյանը։

Ինքը ընդդիմության գործողությունները համարում է նորմալ քաղաքական գործընթաց, որը «հարիր է աշխարհի բոլոր երկրներին»։ Սակայն ո՞ր երկրում են վարչապետ ընտրում փշալարերի ետևում, խորհրդարանի շենքը ոստիկաններով շրջապատած-հետաքրքրվում է լրագրողներից մեկը։

«1500 մարդ միշտ կարող է բողոքավոր լինել»,- հանգիստ պատասխանում է պատգամավորը։

Նա ոստիկանների ներկայությունը բացատրում է ցուցարարների անվտանգությունը պաշտպանելով։ Սերժ Սարգսյանի վարչապետ դառնալուց հետո ինչպիսի՞ն կլինեն ոստիկանության գործողությունները փողոցներն արգելափակած Նիկոլ Փաշինյանի կողմնակիցների հանդեպ։

Պարոն Բաղդասարյանն ուշադիր հետևում է աշխարհի այլ երկրներում բողոքի գործողություններ կանխող ոստիկանների աշխատանքին։ Պարոն Բաղդասարյանը հիացած է մեր ոստիկանների համբերությամբ։ Բայց ինչքա՞ն կարող է ձգվել նրանց համբերությունը։ «Ինձ թվում է, եթե արդեն փորձեն կատարել շրջափակում, վնասներ պատճառել, դա անթույլատրելի է։ Անթույլատրելի է հեղափոխությունը, պետական հեղաշրջման փորձերը»,- ասում է պարոն Բաղդասարյանը։

Վերջինս Նիկոլ Փաշինյանին կոչ է անում սպասել մինչև 2022 թվականը։  Ի դեպ, ինչու՞ ՀՀԿ-ն իր կողմնակիցներին փողոց չի հանում, որպեսզի ընդդիմադիրները տեսնեն, որ իշխանությունն ավելի շատ թիմակից ունի։ «Մենք քաղաքականությունը փողոց չենք հանում։ Դրա համար կա ԱԺ»,- ասում է ՀՀԿ խմբակցության ղեկավարը։

Առաջիկա 5 տարին, ըստ նրա, լինելու է տնտեսական աճի և անվտանգության ապահովման տարի։ Սակայն հայտնի է, որ ապրիլյան պատերազմում անվտանգության երաշխավոր Սերժ Սարգսյանի օրոք հայկական բանակը կորցրեց 800 հեկտար։ «20 հազարի ժամանակ էլ էր Սերժ Սարգսյանը պաշտպանության նախարար»,- հակադարձում է պատգամավորը ավելացնելով, որ Հայաստանն ունի տարածաշրջանում ամենաերաշխավորված անվտանգությունը։

Ի դեպ, նա փողոցում պայքարող ժողովրդին կոչ է անում հանդարտության։