Բայդենը հանդիպել է Գերմանիայի կանցլեր Շոլցին

ԱՄՆ նախագահ Ջո Բայդենը Վաշինգտոնում հանդիպել է Գերմանիայի կանցլեր Օլաֆ Շոլցի հետ։

Գերմանիայի կանցլերի պաշտոնը ստանձնելուց հետո Օլաֆ Շոլցն առաջին անգամ մեկնել է Վաշինգտոն՝ Սպիտակ տանը հանդիպելու նախագահ Ջո Բայդենի հետ: Շոլցը ԱՄՆ-ին և Գերմանիային անվանել է «ամենամոտ դաշնակիցներ», գրում է «Ամերիկայի ձայնը»:

Հանդիպման ընթացքում Շոլցը հավաստիացրել է Բայդենին, որ իր երկիրը կանգնած է ԱՄՆ-ի և ՆԱՏՕ-ի մյուս գործընկերների կողքին՝ հակազդելու Ուկրաինայի դեմ Ռուսաստանի ցանկացած ագրեսիայի։

Գերմանիայի կանցլերի և ԱՄՆ նախագահի բանակցությունները վերաբերել են Ուկրաինայի և Ռուսաստանի սահմանին տիրող լարված իրավիճակին, որտեղ տեղակայված է մոտ 100 հազար ռուս զինծառայող։

«Մենք ամենամոտ դաշնակիցներն ենք և ակտիվորեն աշխատում ենք միասին, դա անհրաժեշտ է, որպեսզի քայլեր ձեռնարկենք Ուկրաինայի դեմ ռուսական ագրեսիայի դեմ պայքարելու համար»,- ասել է Շոլցը Գերմանիայի կանցլերի պաշտոնում Սպիտակ տուն իր անդրանիկ այցի ժամանակ։

Ջո Բայդենն իր հերթին հավանություն է տվել Վաշինգտոնի և Բեռլինի սերտ կապերին՝ հավելելով, որ երկու երկրներն էլ «համաժամանակյա աշխատում են»՝ հետագայում զսպելու ռուսական ագրեսիան։

Պատասխանելով «Հյուսիսային հոսք 2»-ի վերաբերյալ հարցին՝ Բայդենն ասել է, որ նախագծի իրականացման հնարավորություն չի լինի, եթե ռուսական տանկերն ու զորքերը հատեն Ուկրաինայի սահմանը, գրում է DW-ի անգլալեզու տարբերակը։

«Այլևս չի լինի Հյուսիսային հոսք-2-ը: Մենք դրան վերջ կտանք: Ես ձեզ խոստանում եմ, որ մենք կկարողանանք դա անել»,- հայտարարել է Բայդենը:

Տաթև Ֆռանգյան