Ինչու են Քոչարյանն ու Սերժ Սարգսյանն անմասն մնում կարևոր գործընթացից. ԱԺ-ն մարտին նախագահ կընտրի․ ՏԵՍԱՆՅՈւԹ

Երեկ լրացավ Հանրապետության նախագահի թեկնածուների առաջադրման վերջնաժամկետը։ Թեկնածություն առաջադրելու մասին հայտարարել է միայն ԱԺ ՔՊ խմբակցությունը․ իշխանական թեկնածուն Վահագն Խաչատուրյանն է։

Ռոբերտ Քոչարյանի և Սերժ Սարգսյանի ղեկավարած քաղաքական ուժերի խորհրդարանական խմբակցությունները որևէ կերպ չեն մասնակցելու ՀՀ 5-րդ նախագահի ընտրությանը: Ուշագրավ է, որ մշտապես վիճահարույց ընտրություններով Հայաստանը 20 տարի ղեկավարած Քոչարյանի և Սարգսյանի քաղաքական թիմակիցները հայտարարում են, որ իրենց մասնակցությամբ չեն լեգիտիմացնելու նախագահի ընտրությունը:

Ընդդիմադիր «Պատիվ ունեմ» և «Հայաստան» խմբակցություններն ավելի վաղ տարածած հայտարարությունում նշել էին, որ նախագահի ինստիտուտը պետք է հանդես գա որպես չեզոք և հասարակությանը համախմբող ինստիտուտ, իսկ օրվա իշխանությունը որոշել է առաջադրել և միայնակ ընտրել բացառապես սեփական ուժի թեկնածուն։ Ընդդիմադիրները սա որակել են միանձնյա կառավարում և հրավիրում են միջազգային կառույցների ուշադրությունը: Ուշագրավ է, որ ընդդիմադիրները չեն թաքցնում իրենց այն ցանկությունը, որ միջազգային հանրությունը նախագահի ընտրությունները ճանաչի ոչ լեգիտիմ:

Հայաստանի ընդդիմության և ԵԽԽՎ-ի հարաբերությունները, պայմանական ասած, լարվեցին այն բանից հետո, երբ հունվարի 27-ին Եվրոպայի խորհրդի Խորհրդարանական վեհաժողովն ընդունեց «Հայաստանում ժողովրդավարական ինստիտուտների գործունեությունը» բանաձևը:

Հայաստանում ժողովրդավարական արժեքները փաստաթղթում բարձր էին գնահատվել, մտահոգություն կար ատելության և բռնության կոչերի առկայության մասին, իսկ ահա մեծամասնությանը ու ընդդիմությանն առաջարկել է կառուցողական և հարգալից համագործակցություն հաստատել:

Քաղաքագետ Ստյոպա Սաֆարյանը նշում է՝ ԱԺ-ի ընդդիմադիրները չեն հանդուրժել ԵԽԽՎ-ի տրված բարձր գնահատականը ՀՀ իշխանություններին:
Իսկ ահա խշխող ՔՊ-ից նշում են՝ անկախ ընդդիմության ցանկություններից ՀՀ-ն նախագահ ունենալու է: «Պատիվ ունեմ» և «Հայաստան» խմբակցությունները որոշել են ոչ միայն թեկնածու չառաջադրել, այլ նաև այդ օրն ընդհանրապես չգնալ նիստերի դահլիճ ու անգամ կնճռոտ հարցեր չտալ ՔՊ-ի առաջադրած թեկնածուին: «Հայաստան» խմբակցությունից Ագնեսա Խամոյանն ասում է՝ իսմաստ չկա, քանի որ Փաշինյանն իր վերջին խոսնքն ասել է: Քաղաքագետ Ստյոպա Սաֆարյանն ընդդիմադիր պատգամավորի պարզաբանումը համոզիչ չի համարում:

Նախագահի ընտրության հարցի քննարկումն ԱԺ-ում տեղի կունենա մարտի 3-ին մեկնարկող հերթական նիստերի ընթացքում: Առանց ընդդիմության ձայների խորհրդարանական մեծամասնությունն առաջին փուլով նախագահ չի կարողանալու ընտրել, երկրորդ փուլը կմեկնարկի առաջինի ավարտից անմիջապես հետո:

Մանրամասները՝տեսանյութում։

Նարեկ Կիրակոսյան