07.11.2024 | 09:46
Այց Շվեդիա՝ ԵԽ «Կանանց նկատմամբ բռնության հաղթահարումը և գենդերային հավասարության ամրապնդումը Հայաստանում» ծրագրի շրջանակներում
ԱՄՆ նախագահի խորհրդականը՝ Ուկրաինայի շուրջ հակամարտությունում ՌԴ հնարավոր գործողությունների մասին
Քաղաքականություն
07.02.2022 | 19:57
Ռուսաստանի ուղղակի ներխուժումը հարևան երկիր Ուկրաինայի շուրջ հակամարտության զարգացման տարբերակներից մեկն է միայն։ Նման դիրքորոշում է հայտնել Միացյալ Նահանգների նախագահի ազգային անվտանգության հարցերով խորհրդական Ջեյքոբ Սալիվանը ABC, NBC և Fox News հեռուստաալիքների եթերում, գրում է DW-ի ռուսական ծառայությունը։
Նրա խոսքով՝ Մոսկվան կարող է դիմել կիբերհարձակումների, Դոնբասի բռնակցման, կամ գնալ լայնամասշտաբ ներխուժման։ Հարձակումը կարող է տեղի ունենալ ինչպես առաջիկա օրերին, այնպես էլ առաջիկա շաբաթներին, ասել է Սպիտակ տան ներկայացուցիչը։
Իրադարձությունների նման զարգացումը սպառնում է Ուկրաինային հսկայական թվով մարդկային կյանքերի կորստով, ասել է Ջոզեֆ Բայդենի խորհրդականը։
Բայց Վաշինգտոնը կարծում է, որ հակամարտության սրումը ռազմավարական առումով թանկ կարժենա Ռուսաստանին, այդ թվում՝ թույլ չի տալ գործարկել «Հյուսիսային հոսք 2» գազատարը, ասել է նա։ Մոսկվան միանգամայն կարող է ընտրել նաև դիվանագիտության ճանապարհը, հավելել է Սալիվանը։
Նախօրեին մի շարք ամերիկյան և համաշխարհային լրատվամիջոցներ, վկայակոչելով ԱՄՆ բանակի և հետախուզական գործակալությունների տվյալները, հայտնել էին, որ Ռուսաստանի Դաշնությունը ուկրաինական սահմանի մոտ գտնվող շրջաններում կենտրոնացրել է ռազմական անձնակազմի և միջոցների 70 տոկոսը, որոնք անհրաժեշտ են լայնածավալ հարձակման համար։ Փետրվարի կեսերին, ըստ ԱՄՆ-ի, Ուկրաինայի մերձակայքում ռուս զինվորների թիվը կարող է հասնել 150 հազարի: ՌԴ նախագահ Վլադիմիր Պուտինը դեռ դիտարկում է բոլոր սցենարները, վստահ են ԱՄՆ հետախուզական ծառայությունների ներկայացուցիչները։
Տաթև Ֆռանգյան
