18.12.2025 | 01:35
Տհաճ միջադեպ՝ Արման Ծառուկյանի մենամարտի ժամանակ. ՏԵՍԱՆՅՈՒԹ
Պեսկովը մեկնաբանել է ԱՄՆ-ի՝ Արևելյան Եվրոպա լրացուցիչ զորքեր ուղարկելու որոշումը
Քաղաքականություն
03.02.2022 | 15:51
Մոսկվան մշտապես Վաշինգտոնին կոչ է անում դադարեցնել լարվածությունը եվրոպական մայրցամաքում, սակայն, ցավոք, ամերիկացիները շարունակում են դա անել։ Այս մասին հայտարարել է ՌԴ նախագահի խոսնակ Դմիտրի Պեսկովը՝ մեկնաբանելով ԱՄՆ-ի՝ Եվրոպա լրացուցիչ ուժեր ուղարկելու որոշումը, փոխանցում է ՏԱՍՍ-ը։
«Մենք մշտապես կոչ ենք անում մեր ամերիկացի գործընկերներին՝ դադարեցնել լարվածության աճը Եվրոպայում։ Ցավոք, նրանք դա չեն անում։ Խոսքը ոչ միայն տվյալ դեպքում սադրիչ հայտարարությունների մասին է, որ շուտով պատերազմ է սկսվելու, բոլորը ծանր գին կվճարեն և այսպես շարունակ, այլ ամերիկյան զինվորականներին մեր սահմաններին մոտ գտնվող եվրոպական երկրներ ուղարկելու մասին»,- ասել է Պեսկովը։
Նա հավելել է, որ ԱՄՆ-ի որոշումն ուղղված չէ լարվածության ապաէսկալացիային։ Պեսկովը նշել է, որ այդ քայլերը նպաստում են լարվածության աճին։ Նրա խոսքով, «միանգամայն հասկանալի է Ռուսաստանի անհանգստությունը Վաշինգտոնի համապատասխան որոշման վերաբերյալ», բացատրելի են նաև Ռուսաստանի ձեռնարկած միջոցառումները՝ իր անվտանգությունն ապահովելու համար։
«Իհարկե, Ռուսաստանի անհանգստությունն այս դեպքում հասկանալի է, և լիովին արդարացված ու հասկանալի է ցանկացած միջոց, որ կիրառում է ՌԴ-ն՝ սեփական անվտանգության ու սեփական շահերի ապահովման համար»,- ասել է Պեսկովը։
Հավելենք, որ Պենտագոնը հայտարարել է, թե մտադիր է Գերմանիայից Ռումինիա տեղափոխել մոտ հազար ամերիկացի զինծառայողի, ԱՄՆ-ից 2000 զինվորականի էլ՝ Գերմանիա և Լեհաստան:
Էմմա Չոբանյան
