Ուկրաինան և Թուրքիան այսօր ռազմական պայմանագիր կստորագրեն. կետերից մեկը «Բայրաքթար»-ի գործարանի կառուցումն է

Ուկրաինան և Թուրքիան այսօր շրջանակային համաձայնագիր կստորագրեն ռազմարդյունաբերության ոլորտում։ Այն կներառի նաև «Բայրաքթար»-ների արտադրության գործարանի կառուցումը, հայտնել է Ուկրաինայի պաշտպանության նախարար Ալեքսի Ռեզնիկովը, փոխանցում է UNN-ի թղթակիցը։

«Այսօր նախատեսվում է ստորագրել շրջանակային համաձայնագիր։ Երեկ կառավարությունը հաստատել է համաձայնագրի տեքստը․ այն վերաբերում է Ուկրաինայի և Թուրքիայի համագործակցությանը բարձր ռազմական տեխնոլոգիաների ոլորտում։ Այս համաձայնագրի իրականացման օրինակներից մեկը կլինի «Բայրաքթար»-ի գործարանի կառուցումը, անօդաչուներն արտադրվելու են Ուկրաինայում և, համապատասխանաբար, կստեղծվի ուսումնական կենտրոն, որը կպատրաստի մեր օդաչուներին տարբեր կատեգորիաների այս ԱԹՍ-ները շահագործելու համար»,- ասել է Ռեզնիկովը։

Ուկրաինացի պաշտոնյան նշել է, որ համաձայնագրի ստորագրումից հետո համապատասխան ընթացակարգերի վավերացման համար այն կուղարկվի Ուկրաինայի Գերագույն ռադա։ Նա նաև հավելել է, որ ընկերության որոշմամբ՝ հաջորդ սերնդի անօդաչու սարքերը կօգտագործեն ուկրաինական արտադրության «Մոտոր Սիչի» շարժիչներ։

«Դրանք, ըստ էության, կլինեն ուկրաինա-թուրքական «Բայրաքթար»-ներ՝ տեխնոլոգիական բովանդակությամբ, համապատասխանաբար, դրանք կօգտագործվեն ինչպես Ուկրաինայի, այնպես էլ Թուրքիայի զինված ուժերում և այն երկրների, որոնք ցանկություն կունենան ձեռք բերել դրանք»,- ասել է Ուկրաինայի պաշտպանության նախարարը։

Դեռևս անցյալ տարվա սեպտեմբերին Ուկրաինայի ԱԳ նախարար Դմիտրի Կուլեբան ասել էր, որ Ուկրաինայի տարածքում թուրքական «Բայրաքթար» անօդաչու թռչող սարքերի արտադրությամբ զբաղվող գործարան է լինելու։

Տաթև Ֆռանգյան