10.10.2026 | 14:28
ԵՄ-ն շնորհավորել է Երևանի 2808-ամյակը
Ուկրաինան բացառել է Դոնբասին հատուկ կարգավիճակի տրամադրումը
Քաղաքականություն
02.02.2022 | 18:33
Ռուսաստանի կողմից օկուպացված տարածքները չեն ստանա հատուկ կարգավիճակ, ինչպես կցանկանար Կրեմլը։ Այս մասին Rzeczpospolita-ին տված հարցազրույցում ասել է Ուկրաինայի արտգործնախարար Դմիտրի Կուլեբան, փոխանցում է УНН-ը։
Կուլեբային հարցրել են՝ պատրա՞ստ է Ուկրաինան հատուկ կարգավիճակ տալ օկուպացված Դոնեցկի և Լուգանսկի շրջաններին, որպեսզի նրանք «իրականում վետոյի իրավունք ստանան Ուկրաինայի իշխանությունների ռազմավարական որոշումների վրա»։
«Ուկրաինայի ոչ մի շրջան իրավունք չի ունենա վետո դնել համազգային որոշումների վրա։ Հետևաբար, չի լինի հատուկ կարգավիճակ, ինչպես պատկերացնում է Ռուսաստանը, չի լինի վետո: Մենք ապակենտրոնացման շատ խորը բարեփոխում ենք իրականացնում, պատրաստ ենք աշխատել մինսկյան պայմանավորվածությունների կատարման ուղղությամբ։ Բայց Մինսկի պայմանավորվածությունները սկսվում են անվտանգության խնդիրներից։ Այնտեղ քաղաքական մասը միայն երկրորդ տեղում է։ Ուստի բոլորն առաջին հերթին պետք է կենտրոնանան անվտանգության վրա»,- ասել է պաշտոնյան։
Ուկրաինացի պաշտոնյան նշել է, որ եթե Ռուսաստանը բարեխղճորեն գործի, ապա անվտանգության ներկայիս ճգնաժամը հնարավոր է հաղթահարել դիվանագիտական ճանապարհով։ Միաժամանակ, ներկա պայմաններում Ուկրաինան չպետք է գնա զիջումների, ընդգծել է Կուլեբան։
Տաթև Ֆռանգյան
