«Ուրարտուի» հաղթարշավը շարունակվում է

Կարեն Դեմիրճյանի անվան մարզահամերգային համալիրում շարունակվում է բասկետբոլի Vbet Ա-Լիգայի կանոնավոր առաջնությունը: Մինչ օրս կայացած հանդիպումներից հետո «Ուրարտուն» գլխավորում է մրցաշարային աղյուսակը՝ իր ակտիվում ունենալով 38 միավոր. տեղեկացնում են ԿԳՄՍՆ-ից։

Հունվարի 14-ից ի վեր «Ուրարտուն» Ա-Լիգայի կանոնավոր առաջնության շրջանակում անցկացրել է 5 հանդիպում և տարել նույնքան հաղթանակ: Այս ընթացքում թիմը նախ 89-84 հաշվով առավելության է հասել «ԱԻԱ Սթարսի» նկատմամբ, ապա 100-81 հաշվով հաղթել է «Գյումրիին», 99-96 հաշվով՝ «Արարատին», 98-85 հաշվով՝ ՖԻՄԱ-ին, 110-98 հաշվով էլ ուժեղ է գտնվել ԲԿՄԱ-ից:

Մրցաշարային աղյուսակում «Ուրարտուին» 33 միավորով հետևում է «Էրեբունին»: Թիմն այս ընթացքում 3 հաղթանակ է տարել ՖԻՄԱ-ի (109-95), ԲԿՄԱ-ի (137-97) ու «Արարատի» նկատմամբ (99-98) և կրել է 1 պարտություն «ԱԻԱ Սթարսից» (77-78):

ԲԿՄԱ-ի և «Գյումրիի» միջև խաղում ԲԿՄԱ թիմի խաղացող Բրայս Սաքստոնը վաստակել է 56 միավոր և նոր ռեկորդ է սահմանել՝ գերազանցելով «Էրեբունիի» բասկետբոլիստ Էդվին Քոլին, ով մեկ խաղում հավաքել էր 50 միավոր:

Լավագույն եռյակն այս պահին 28 միավորով եզրափակում է «ԱԻԱ Սթարսը»:

Առաջիկա օրերին բասկետբոլի Vbet Ա-Լիգայի կանոնավոր առաջնության շրջանակում 5 հանդիպում կկայանա:

Այսօր՝ փետրվարի 1-ին, ՖԻՄԱ-ն կմրցի «Էրեբունիի» հետ, խաղը կմեկնարկի ժամը 19:00-ին, իսկ «Արարատն» ուժերը կչափի ԲԿՄԱ-ի հետ: Այս խաղի մեկնարկն էլ 21:00-ին է: Փետրվարի 2-ին՝ ժամը 18:00-ին, կմեկնարկի «Գյումրի»-«Էրեբունի» հանդիպումը: Եվս երկու խաղ կկայանա փետրվարի 3-ին: Ժամը 17:00-ին միմյանց հետ կմրցեն «ԱԻԱ Սթարսն» ու ՖԻՄԱ-ն, 20:00-ին կմեկնարկի ԲԿՄԱ-«Արարատ» հանդիպումը: