Քաղաքականություն
01.02.2022 | 16:30Հայաստանում նոր նախագահ կընտրեն․ մեկ շաբաթ առաջ հրաժարականի դիմում ներկայացրած Արմեն Սարգսյանն այդպես էլ հետ չվերցրեց այն․ դիմումն ընդունվել է, իսկ ԱԺ նախագահ Ալեն Սիմոնյանն արձանագրություն է ստորագրել ՀՀ նախագահ Արմեն Սարգսյանի լիազորությունները դադարած համարելու մասին։
Մինչ նոր նախագահի ընտրությունը՝ Հանրապետության նախագահի պարտականությունները կկատարի հենց Ալեն Սիմոնյանը՝ Բաղրամյան 26-ից։ Սիմոնյանն արդեն իսկ ստանձնել է Հանրապետության նախագահի լիազորությունները և հանդիպել աշխատակազմի հետ։ Ազգային ժողովում Սիմոնյանին կփոխարինի խորհրդարանի փոխխոսնակ Հակոբ Արշակյանը՝ կրկին մինչև նորընտիր նախագահի կողմից պաշտոնի ստանձնումը։
Նոր նախագահ, համաձայն ՀՀ Սահմանադրության, պետք է ընտրեն աթոռը թափուր մնալուց ոչ շուտ, քան 25, և ոչ ուշ, քան 35 օր հետո: Նախագահ կարող է ընտրվել 40 տարին լրացած, վերջին 6 տարում միայն Հայաստանի Հանրապետության քաղաքացի հանդիսացող, վերջին 6 տարում Հայաստանի Հանրապետությունում մշտապես բնակվող, ընտրական իրավունք ունեցող և հայերենին տիրապետող յուրաքանչյուր ոք: Նույն անձը երկրի նախագահ կարող է ընտրվել միայն մեկ անգամ:
Նախագահի հրաժարականի մասին հայտարարությունից հետո լուրեր տարածվեցին, թե իշխող ուժի նախագահի թեկնածուն վարչապետի աշխատակազմի ղեկավար Արայիկ Հարությունյանն է, սակայն տեղեկությունը չհաստատվեց։ Ավելի ուշ սկսեց շրջանառվել բարձր տեխնոլոգիական արդյունաբերության նախարար Վահագն Խաչատուրյանի անունը։ Ինքը՝ Խաչատուրյանը, երեկ լրագրողների հետ զրույցում, ըստ էության, հաստատեց, որ իշխող ուժից նախագահի թեկնածուն դառնալու առաջարկ ստացել է։ Ավելին՝ ասաց, որ ունի բոլոր չափանիշները, որոնք անհրաժեշտ են նախագահ դառնալու համար։ Այսօր ԱԺ իշխանական խմբակցության պատգամավորները Factor TV-ի հետ զրույցում վերահաստատել են՝ իրենց թեկնածուն 99 տոկոսով հենց Խաչատուրյանը կլինի։
Նախագահի ընտրության համար առաջին փուլում անհրաժեշտ է 81 ձայն․ 71 պատգամավոր ունեցող իշխող «Քաղաքացիական պայմանագիր» խմբակցությունը առաջին փուլում միայնակ չի կարող ընտրել նախագահ։ Սահմանադրությամբ նախատեսվում է ևս երկու փուլ․ երկրորդ և երրորդ փուլերի համար անհրաժեշտ է 65 և 54 ձայն։ Ստացվում է, որ երկրորդ փուլում իշխող թիմն արդեն միայնակ կարող է նախագահ ընտրել իր առաջադրած թեկնածուին։
Մանրամասները՝ տեսանյութում։
Արփի Հակոբյան
