Իրանի հետ միջուկային ծրագրի շուրջ բանակցություններն ավարտական փուլում են. ԱՄՆ Պետքարտուղարություն

Իրանի հետ միջուկային ծրագրի շուրջ բանակցություններն ավարտական փուլում են։ Իրանի միջուկային ծրագրի շուրջ Գործողությունների համատեղ համապարփակ ծրագրի (JCPOA) վերականգնման շուրջ համաձայնության հասնել հնարավոր է միայն մի քանի շաբաթվա ընթացքում, որից հետո համաձայնագրին վերադարձն այլևս հնարավոր չի լինի։ Այս մասին հայտարարել է ԱՄՆ Պետքարտուղարության ներկայացուցիչը։

Քանի որ Իրանը շարունակում է իր միջուկային գործունեությունը, գործընթացի ժամանակացույցը կրճատվում է, ասել է Պետքարտուղարության ներկայացուցիչը։

Ամերիկացի պաշտոնյայի խոսքով՝ բանակցությունները հասել են ավարտին։

«Մենք այժմ գտնվում ենք ճանապարհի եզրափակիչ հատվածում: Ինչպես արդեն ասել ենք՝ դրանք (բանակցությունները) չեն կարող հավերժ շարունակվել: Դա ո՛չ նախազգուշացում է, ո՛չ սպառնալիք, ո՛չ էլ արհեստականորեն սահմանված ժամկետներ: Դա ընդամենը պահանջ է, որը մենք հասցրել ենք Իրանին և «5+1» խմբի բոլոր անդամներին։ Սա արհեստական վերջնաժամկետ չէ, վերջնագիր չէ, պարզապես փաստի հայտարարություն է, որի մասին իրանցիները գիտեն»,- պարզաբանել է նա։

Հաշվի առնելով միջուկային արդյունաբերության ոլորտում Իրանի առաջխաղացման տեմպերը՝ գործարքի հասնելու համար մնացել է ընդամենը մի քանի շաբաթ, ասել է աղբյուրը:

«Դրանից հետո, ցավոք, այլևս հնարավոր չի լինի վերադառնալ JCPOA-ին և վերականգնել այն առավելությունները, որոնք նախատեսված էին այս համաձայնագրով միջուկային զենքի տարածումը կանխելու առումով»,- ասել է նա։

Պաշտոնյան հիշեցրել է, որ միջուկային գործարքի շուրջ բանակցությունները շարունակվում են շուրջ 10 ամիս, և այս ընթացքում ԱՄՆ-ի ու Իրանի միջև հիմնական տարաձայնությունների ցանկը զգալիորեն նեղացել է։

«Հիմա ժամանակն է քաղաքական որոշումներ կայացնելու և պարզելու՝ արդյո՞ք Իրանը պատրաստ է ընդունել այն որոշումները, որոնք անհրաժեշտ են JCPOA-ի փոխադարձ պահպանման համար»,- ասել է ԱՄՆ արտաքին քաղաքական գերատեսչության ներկայացուցիչը։

Տաթև Ֆռանգյան