14.07.2026 | 16:38
Քաղցրաշեն գյուղում 13-ամյա աղջիկ է մահացել․ վարչական շրջանի ղեկավարը՝ դեպքի մասին
Ինչո՞ւ են քանդվել Տաթև-Աղվանի ճանապարհի որոշ հատվածներ․ ՏԿԵՆ-ի պատասխանը Factor.am-ի հարցմանը․ ՏԵՍԱՆՅՈՒԹ
Քաղաքականություն
31.01.2022 | 20:02
Գորիս-Կապան այլընտրանքային նորակառույց ավտոճանապարհի որոշ հատվածներում թերություններ են հայտնաբերվել։ Այս մասին Factor.am-ի գրավոր հարցմանն ի պատասխան՝ հայտնել են Տարածքային կառավարման և ենթակառուցվածքների նախարարությունից՝ հավելելով, որ ճանապարհները դեռևս չեն ընդունվել շահագործման։
Ըստ նախարարության՝ Տաթև-Աղվանի ավտոճանապարհին հիմնանորոգման աշխատանքներն իրականացվել են ճանապարհային երթևեկության պայմաններում, իսկ երթևեկությունը բավականին ինտենսիվ և ծանրաբեռնված է եղել, ինչն էապես ազդել է աշխատանքի կատարման ընթացքի վրա:
Տարածքային կառավարման և ենթակառուցվածքների նախարարի տեղակալ Քրիստինե Ղալեչյանը մեր հարցմանն ի պատասխան տեղեկացնում է, որ Տաթև-Աղվանի ավտոճանապարհն ասֆալտապատված է, սակայն 25-ից 68-րդ կմ-ն ընկած հատվածում հիմնանորոգման աշխատանքները կատարվել են 2020-2021 թվականներին, և այն դեռևս շահագործման հանձնված չէ։
25-ից 37-րդ կմ-ն ընկած հատվածում որոշակի թերություններ են հայտնաբերվել հիմնանորոգված ճանապարհային պատվածքի և կողնակների վրա։ 37-ից 55-րդ կմ-ն ընկած հատվածում իրականացվել են ասֆալտբետոնե ծածկի ներքին շերտի տեղադրման աշխատանքներ։
55-ից 68-րդ կմ-ն ընկած հատվածում հայտնաբերվել են որոշակի թերություններ հիմնանորոգված ճանապարհային պատվածքի վրա, և ճանապարհը չի ընդունվել շահագործման։
Խնդրահարույց ճանապարհահատվածներում աշխատանքները պարտավոր է իրականացնել կապալառու կազմակերպությունը՝ բացառապես իր հաշվին։ Գարնանը, երբ եղանակային պայմանները թույլ տան, կապալառու կազմակերպությունը պետք է վերացնի ներքին շերտի վրա առկա թերությունները, որից հետո կտեղադրվի ասֆալտբետոնե ծածկի վերին շերտը։
Շահագործման ընդունելուց հետո ճանապարհը 3 տարի գտնվելու է երաշխիքային սպասարկման ժամկետում։ Այդ ժամանակահատվածում ի հայտ եկած թերությունները կապալառու կազմակերպությունները պարտավոր են վերացնել սեփական միջոցներով, և միայն դրանից հետո ճանապարհը կընդունվի շահագործման։
Հավելենք, որ սեպտեմբերին, երբ Գորիս-Կապան ճանապարհի՝ ադրբեջանական վերահսկողության տակ հայտնված հատվածում ադրբեջանցիները սկսեցին կանգնեցնել իրանցի բեռնափոխադրողներին և տուրք պահանջել, Հայաստանի իշխանությունները հայտարարեցին, որ արագ կբարեկարգեն այլընտրանքային գրունտային ճանապարհը։ Տարածքային կառավարման և ենթակառուցվածքների նախարարությունից չեն պատասխանել մեր գրավոր հարցմանն այն մասին՝ արդյո՞ք անորակ շինարարության համար որևէ մեկը պատասխանատվություն կրելու է։
Մանրամասները՝ տեսանյութում։
Արփի Հակոբյան
