17.12.2025 | 15:14
Անկարան ու Բաքուն ռազմական համագործակցության հարցեր են քննարկել
ՄԱԿ-ը հայտնել է Աֆղանստանում ավելի քան 100 մարդու մահապատժի մասին՝ չնայած հայտարարված համաներմանը
Քաղաքականություն
31.01.2022 | 17:53
ՄԱԿ-ը ստացել է «արժանահավատ տեղեկություններ», որ Աֆղանստանի տապալված կառավարության, անվտանգության ուժերի և միջազգային զորքերի հետ աշխատող ավելի քան 100 անդամներ սպանվել են այն բանից հետո, ինչ օգոստոսի 15-ին թալիբները գրավել են Աֆղանստանը: Այս մասին հայտնում է The Guardian-ը՝ վկայակոչելով ՄԱԿ-ի զեկույցը։
ՄԱԿ-ի գլխավոր քարտուղար Անտոնիո Գուտերեշն ասել է, որ մահերի «ավելի քան երկու երրորդը» եղել է թալիբների կողմից արտադատական մահապատիժների հետևանք՝ չնայած նախկին կառավարության և ԱՄՆ-ի գլխավորած կոալիցիոն ուժերի հետ կապ ունեցած անձանց համար հայտարարված «ընդհանուր համաներմանը»:
Աֆղանստանում ՄԱԿ-ի քաղաքական առաքելությունը նաև «արժանահավատ տեղեկություններ է ստացել առնվազն 50 մարդու արտադատական սպանությունների մասին, որոնք կասկածվում էին ԻԼԻՊ-ի հետ կապերի մեջ»:
Բացի այդ, ՄԱԿ-ի առաքելությունը ստացել է արժանահավատ տեղեկություններ նախկին կառավարության և կոալիցիայի անդամների «հարկադիր անհետացումների և այլ խախտումների մասին, որոնք ազդում են կյանքի իրավունքի և ֆիզիկական անձեռնմխելիության վրա»:
«Իրավապաշտպանները և լրատվամիջոցների աշխատակիցները նույնպես շարունակում են ենթարկվել «հարձակման, ահաբեկման, ոտնձգությունների, կամայական ձերբակալությունների, դաժան վերաբերմունքի և սպանության», – ասել է Գուտերեշը:
Ութ քաղաքացիական ակտիվիստ սպանվել է, այդ թվում՝ երեքը՝ թալիբների կողմից, երեքը՝ «Իսլամական պետության» ծայրահեղականների, իսկ 10-ը ժամանակավորապես ձերբակալվել է, ծեծի և սպառնալիքի ենթարկվել թալիբների կողմից։ Երկու լրագրող սպանվել է, մեկը՝ ԻԼԻՊ-ի զինյալների կողմից, իսկ երկուսը վիրավորվել է անհայտ զինված անձանց կողմից:
Գլխավոր քարտուղարն ասել է, որ ՄԱԿ-ի առաքելությունը փաստագրել է ժամանակավոր ձերբակալությունների, ծեծի և ահաբեկման սպառնալիքների 44 դեպք, որոնցից 42-ը՝ թալիբների կողմից։
Իր հերթին, «Թալիբան» շարժման ներկայացուցիչ Զաբիուլլա Մուջահիդը հերքել է ՄԱԿ-ի գլխավոր քարտուղար Անտոնիո Գուտերեշի պնդումները, թե սպանությունների մեղավորը թալիբներն են։
Տաթև Ֆռանգյան
