16.01.2025 | 09:53
«Հայաստան-ԵՄ ռազմավարական գործընկերության խթանումը Վիշեգրադյան քառյակի փորձի հիման վրա». ՈՒՂԻՂ
Մեծ Բրիտանիան խոստանում է ուժեղացնել ՌԴ-ի դեմ պատժամիջոցները Ուկրաինա ներխուժելու դեպքում
Քաղաքականություն
31.01.2022 | 16:36
Մեծ Բրիտանիան կուժեղացնի Ռուսաստանի դեմ պատժամիջոցները՝ Ուկրաինայի դեմ «հետագա գործողությունների» դեպքում։ Իրադարձությունների նման զարգացման դեպքում նոր սահմանափակող միջոցները կանդրադառնան «Կրեմլի հետ սերտ կապեր ունեցող» բիզնեսների և անհատների վրա։ Այս մասին հայտարարել է Գանձապետարանի գլխավոր քարտուղար Սայմոն Քլարկը Sky News-ի եթերում, գրում է DW-ի ռուսական ծառայությունը։
Միաժամանակ, Քլարկը կարծիք է հայտնել, որ Միացյալ Թագավորությունը պատժամիջոցների առումով ավելի վճռական է գործում, քան ԵՄ շատ երկրներ։
«Brexit-ից հետո Բրիտանիան հանդիսանում է Պուտինի վարչակարգի գործողությունների առաջատար հակառակորդներից մեկը»,- ընդգծել է նա։
Միաժամանակ, Սայմոն Քլարկը հերքել է մեղադրանքները, թե Լոնդոնը վտանգի է ենթարկվում՝ Ռուսաստանից Բրիտանիա հոսող կեղտոտ փողերի պատճառով։ Երբ հարցազրուցավար Քեյ Բերլին Քլարկին հարց է ուղղել ռուսական և բրիտանական քաղաքացիություն ունեցող նախկին բանկիր Լյուբով Չերնուխինայի և Ռուսաստանից այլ դոնորների կողմից «Պահպանողական կուսակցությանը» կատարած նվիրատվության մասին, Քլարկը պատասխանել է. «Ոչ ոք ռուսներից փող չի վերցրել»:
«Եկեք պարզենք իրավիճակը. նվիրատվություն անելու համար դուք պետք է լինեք Մեծ Բրիտանիայի քաղաքացի: Բոլոր նման նվիրատվությունները հայտարարագրված և պատշաճ կերպով ստուգված են»,- ասել է նա:
Քաղաքական գործչի խոսքով՝ «ոչ մի անօրինական բան չկա նրանում, որ որևէ գործարար կապեր է ունենում որևէ երկրի հետ, եթե, իհարկե, նրա կարողությունը ձեռք է բերվել օրինական ճանապարհով»։
«Ինչպես են նման գործարարները որոշում ծախսել իրենց գումարը՝ դա իրենց գործն է»,- հավելել է Միացյալ Թագավորության գանձապետարանի գլխավոր քարտուղարը:
Սպասվում է, որ այս շաբաթ Մեծ Բրիտանիայի ԱԳՆ-ն կներկայացնի Ռուսաստանի ֆինանսական շահերի դեմ պատժամիջոցները խստացնելու ծրագիրը։
Մեծ Բրիտանիան, Եվրամիությունը և Միացյալ Նահանգները բազմիցս զգուշացրել են Կրեմլին, որ Ռուսաստանի դեմ խիստ պատժամիջոցներ կկիրառեն, եթե Մոսկվան որոշի ներխուժել Ուկրաինա։
Մինչ այդ, Nikkei Asia լրատվականը գրում է, որ Մեծ Բրիտանիայի վարչապետ Բորիս Ջոնսոնը չեղարկել է փետրվարի կեսերին նախատեսված այցը Ճապոնիա։
«Ջոնսոնի համար այս ուղևորությունը դժվար է, քանի որ Արևմուտքի և Ռուսաստանի միջև լարվածությունն աճում է Ուկրաինայի շուրջ»,- գրում է հրատարակությունը:
Լրագրողների տվյալներով՝ ստեղծված իրավիճակում Ջոնսոնի այցը չեղարկելու որոշումը համատեղ ընդունել են Ճապոնիայի և Մեծ Բրիտանիայի կառավարությունները։
Տաթև Ֆռանգյան
