Վահագն Խաչատուրյանը՝ ՀՀ նախագա՞հ․ Արմեն Սարգսյանի հրաժարականի դիմումը հետ վերցնելու ժամկետը լրանում է․ ՏԵՍԱՆՅՈՒԹ

Այսօր հայտնի կդառնա՝ նախագահ Արմեն Սարգսյանի հրաժարականն ընդունված է, թե ոչ։ Նախորդ կիրակի օրը երեկոյան նախագահը հրաժարականի մասին անակնկալ հաղորդագրություն տարածեց։ Չորս տարի պաշտոնավարելուց հետո Սարգսյանը պնդում է․ նախագահը ստիպված է պետականության երաշխավոր լինել՝ փաստացի չունենալով որևէ իրական գործիք: Լոնդոնում գտնվող Սարգսյանը մեկ շաբաթ ժամանակ ուներ դիմումը հետ վերցնելու համար, սակայն այս օրերի ընթացքում նախագահականից այդ մասին հուշող որևէ տեղեկություն չի հրապարակվել։ ԱԺ նախագահի աշխատակազմից ևս Factor.am-ի հետ զրույցում հայտնեցին, որ Ազգային Ժողովը հրաժարականը հետ վերցնելու որևէ դիմում չի ստացվել։  

Նախագահ կարող է ընտրվել 40 տարին լրացած, վերջին 6 տարում միայն Հայաստանի Հանրապետության քաղաքացի հանդիսացող, վերջին 6 տարում Հայաստանի Հանրապետությունում մշտապես բնակվող, ընտրական իրավունք ունեցող և հայերենին տիրապետող յուրաքանչյուր ոք: Նույն անձը երկրի նախագահ կարող է ընտրվել միայն մեկ անգամ: 

Նախագահի հրաժարականի մասին հայտարարությունից հետո սկսեցին լուրեր տարածվել, որ այդ պաշտոնին իշխող ուժի թեկնածուն վարչապետ Նիկոլ Փաշինյանի աշխատակազմի ղեկավար Արայիկ Հարությունյանն է։ Լուրերը, սակայն, այդպես էլ խոսակցությունների մակարդակում մնացին։ 

Նախագահի թեկնածուի շուրջ լուրերը հստակություն ստացան երեկ․ Նիկոլ Փաշինյանի հիմնադրած «Հայկական ժամանակ» լրատվական կայքը հայտնեց, որ իրենց տեղեկություններով նախագահի թեկնածուն Բարձր տեխնոլոգիական արդյունաբերության նախարար Վահագն Խաչատուրյանն է։ Factor.am-ի տեղեկություններով նախարարն իսկապես նման առաջարկ ստացել է, սակայն առաջարկը Խաչատուրյանը դեռևս չի մեկնաբանում։ Ընդդիմությունը մինչ օրս թեկնածուի անուն չի հրապարակում։

Նշենք՝ Հայաստանի Սահմանադրության համաձայն՝ հանրապետության նախագահի պաշտոնանկության, լիազորությունների կատարման անհնարինության, հրաժարականի կամ մահվան դեպքերում նախագահի պաշտոնը թափուր մնալուց ոչ շուտ, քան 25, և ոչ ուշ, քան 35 օր հետո անցկացվում է նախագահի արտահերթ ընտրություն: Այս դեպքում՝ ըստ ամենայնի, ընտրությունը տեղի կունենա փետրվարի 25-ից սկսած՝ 10 օրվա ընթացքում։ 

Մանրամասները՝ տեսանյութում։ 

Ռոզա Վարդանյան