08.06.2026 | 16:44
Փաշինյանը հաղթեց․ տարածաշրջանի ապագան դեռ գրվելու փուլում է․ Դոնալդ Տուսկ
Եգիպտոսի դատարանը մահապատժի է դատապարտել իսլամիստների 10 կողմնակիցների
Քաղաքականություն
30.01.2022 | 19:14
Կահիրեի քրեական դատարանը նախնական կարգով երկրում ահաբեկչական ճանաչված «Մուսուլման եղբայրներ» իսլամիստական ասոցիացիայի 10 կողմնակիցների դատապարտել է մահապատժի՝ քայքայիչ գործունեության համար: Այս մասին հաղորդում է ТАСС-ը։
Այս գործով, որը ստացել է «Հելուանյան բրիգադներ» անվանումը, անցնում է 215 մարդ: Մասնավորապես, դատական որոշման մեջ նշվում էր, որ ամբաստանյալները 2013 թվականի օգոստոսից մինչև 2015 թվականի փետրվար ընկած ժամանակահատվածում գլխավորել են ընդհատակյա ցանցը, զինված հարձակումներ են իրականացրել ուժայինների դեմ և զբաղվել պետական գույքի, գլխավորապես՝ էլեկտրացանցերի փչացմամբ:
Դատավճիռները նախնական բնույթ են կրում և, երկրում գործող օրենսդրության համաձայն, կուղարկվեն Հանրապետության գերագույն մուֆթիի քննարկմանը, որը կարող է ինչպես հաստատել, այնպես էլ մերժել: Սակայն նրա որոշումը խորհրդատվական բնույթ է կրում։ Վերջնական դատավճիռները պետք է հրապարակվեն դատարանի կողմից հունիսի 19-ի նիստում։
