Ուկրաինայի դեմ պատերազմը կհանգեցնի կործանարար հետևանքների. Amnesty International

Ռուսաստանի ներխուժումն Ուկրաինա «սպառնում է խաթարել աշխարհաքաղաքական զսպումների և հավասարակշռության ողջ համակարգը՝ անկանխատեսելի հետևանքներով մարդու իրավունքների համար ամբողջ աշխարհում։ Այս մասին ասվում է Amnesty International իրավապաշտպան կազմակերպության հայտարարությունում, գրում է DW-ի ռուսական ծառայությունը:

Ուկրաինա ռուսական ներխուժման սպառնալիքն արդեն իսկ ազդում է միլիոնավոր մարդկանց իրավունքների վրա այդ երկրում և դրա սահմաններից դուրս, իսկ իրական ռազմական գործողությունների հետևանքներն ավելի կործանարար կլինեն, նշել է Amnesty International-ը (AI):

«Ուկրաինայի նորագույն պատմությունը նշանավորվում է Դոնբասում ռուսական զորքերի մասնակցությամբ հակամարտությամբ և Ղրիմի անօրինական բռնակցմամբ: Երկու վայրերում էլ ընտանիքներ և ամբողջ համայնքներ քայքայվել են, զինված մարդիկ անպատիժ կերպով ոտնահարել են խաղաղ բնակիչների իրավունքները»,- մատնանշել է AI-ի գլխավոր քարտուղար Անյես Կալամարը, ում խոսքերը մեջբերված են կազմակերպության կողմից հունվարի 28-ին հրապարակված հաղորդագրությունում։

Կալամարը նախազգուշացրել է թե՛ տարածաշրջանի մարդկանց կյանքին, թե՛ քաղաքացիական ենթակառուցվածքներին սպառնացող վտանգի, բնակչության կենսապահովման հնարավոր զրկանքների և սննդի հնարավոր լուրջ պակասի մասին: Բացի այդ, զինված հակամարտությունը փախստականների զանգվածային տեղահանումներ առաջացնելու ներուժ ունի, ասվում է հայտարարության մեջ։

«Սարսափելի է պատկերացնել, թե ինչ մասշտաբների կարող է հասնել միգրացիոն ճգնաժամը Ուկրաինայում ռազմական գործողությունների սրման դեպքում: Դա կլինի հումանիտար աղետ մայրցամաքային մասշտաբով, երբ միլիոնավոր փախստականներ պաշտպանություն կփնտրեն հարևան եվրոպական երկրներում»,- ասել է Կալամարը։

Amnesty International-ը հիշեցրել է, որ ռուսական զորքերը վերջին տարիներին խախտել են միջազգային իրավունքը այլ ռազմական հակամարտություններում, մասնավորապես՝ Սիրիայում, և դրա համար պատասխանատվություն չեն կրել: Այս առումով կազմակերպությունը չափազանց մտահոգված է Ուկրաինայում պատերազմի դեպքում դրանց կրկնության հավանականությամբ։

Տաթև Ֆռանգյան