Հասարակություն
28.01.2022 | 11:08Ամենայն հայոց կաթողիկոսն Գարեգին այսօր՝ հունվարի 28-ին, Բանակի կազմավորման 30-ամյակի օրը, այցելել է «Եռաբլուր» զինվորական պանթեոն: Նրան ուղեկցում են հոգևորականները: Նշենք, որ արդեն ավանդույթ է դարձել, որ Գարեգին Բ-ն «Եռաբլուր» այցելում է իշխանության ներկայացուցիչներից առանձին: Այսօր էլ նա պաշտոնյաների հեռանալուց հետո եկավ «Եռաբլուր»:
Գարեգին Բ-ն հրաժարվեց պատասխանել լրագրողների հարցերին՝ ասելով՝ թույլ տվեք օրվա խորհուրդն ապրել:
«Այսօր Բանակի օրն է, նաև Հայոց բանակի կազմավորման 30-ամյակը, և մենք միաբան մեր հայրերի հետ բարձրացանք այստեղ, որպեսզի մեր աղոթքը առ Աստված բարձրացնենք մեր քաջարի զավակների հոգիների հանգստության համար, ինչպես նաև հայցենք, որ Տերը օրհնի մեր ժողովրդի կյանքը՝ ապրելու խաղաղության և ապահովության պայմաններում, ապրելու արարողական, ստեղծագործական կյանքով, բարօրության մեջ: Նաև մեր հայցը առ Աստված բարձրացրեցինք, որպեսզի Տիրոջ օրհնությամբ զորանա Հայոց բանակը և պաշտպանի խաղաղ, անվտանգ կյանքը մեր երկրի և ժողովրդի: Թող Տերը օգնական ու պահապան լինի հայոց ազգին՝ ի Հայաստան, Արցախ և ի Սփյուռս», – ասաց Ամենայն Հայոց Կաթողիկոսը:
Մանրամասները՝ տեսանյութում:
