Զոհ ու վիրավորներ Տաջիկստանի և Ղրղզստանի սահմանին. փոխհրաձգությունն այս պահին դադարել է

Տաջիկստանի և Ղրղզստանի սահմանապահ զորքերը սկսել են փոհրաձգությունն այն բանից հետո, երբ մի խումբ մարդիկ փակել են ճանապարհը Ղրղզստանի Բատկեն շրջանի Տորթ-Կոչո շրջանում։ Կողմերը միմյանց մեղադրում են հակամարտության սրման մեջ, գրում է BBC-ի ռուսական ծառայությունը։

BBC-ի ղրղզական ծառայությունը հայտնում է, որ կրակոցները տեղի են ունեցել Ղրղզստանի Կոկ-Տաշ գյուղի սահմանային դիրքում։ Հաղորդվել է նաև, որ տաջիկ սահմանապահները Տորթ-Կոչո և Ուչ-Դոբո շրջաններում կիրառել են ականանետեր և նռնակներ։

Տեղի ժամանակով կեսգիշերին Ղրղզստանի սահմանապահ ծառայությունը հայտնել է, որ սահմանի երկու հատվածներում կրակը դադարել է, իսկ մյուս երկուսում՝ պարբերաբար կրակոցներ են լսվել։

Ղրղզստանի սահմանային ծառայությունից էլ հայտնել են, որ կողմերը բանակցություններ են վարում։ Դրանց մասնակցում են Բատկենի շրջանում Ղրղզստանի նախագահի ներկայացուցիչը և Տաջիկստանի Սուղդի շրջանի նահանգապետը, ինչպես նաև երկու կողմերի սահմանապահների ներկայացուցիչներ։ Ավելի վաղ Ինտերֆաքսը՝ վկայակոչելով Ղրղզստանի սահմանային ծառայությանը, հայտնել էր, որ տեղական ժամանակով ժամը 22:30-ին տաջիկ սահմանապահներն ու զինվորականները դեռ շարունակում են պարբերաբար կրակել ղրղզների դիրքերի ուղղությամբ։

DW-ի ռուսական ծառայության հաղորդմամբ էլ՝ տարբեր տվյալներով ղրղզական կողմն ունի 7-ից 11 վիրավոր, որոնց թվում կան ինչպես զինվորականներ, այնպես էլ խաղաղ բնակիչներ։ Տաջիկական ASIA-Plus-ի փոխանցմամբ էլ՝ Սոմոնիյոն գյուղի բնակիչը մահացել է, երբ արկն ընկել է նրա տան վրա։ Տաջիկստանի հետ սահմանային գոտուց արդեն տարհանվել է մոտ 1500 մարդ, հայտնել են Ղրղզստանի իշխանությունները։

ՌԻԱ Նովոստին, վկայակոչելով Սուղդի շրջանի ղեկավարի մամուլի ծառայությանը, հայտնում է, որ այս պահին Տաջիկստանի և Ղրղզստանի սահմանային հատվածում կրակոցները դադարել են Տաջիկստանի Սուղդի շրջանի ղեկավարի և Ղրղզստանի Բատկենի շրջանի նահանգապետի բանակցություններից հետո։

Տեղեկացվում է, որ հակամարտության կողմերի միջև բանակցությունները կշարունակվեն ուրբաթ օրը՝ ուժային կառույցների ներկայացուցիչների և սահմանամերձ շրջանների ղեկավարների մասնակցությամբ։

Տաթև Ֆռանգյան