90-ականներից որևէ տարի չի եղել, որ Թուրքիայի հետ կոնտակտ չլինի. Արարատ Միրզոյան. ՏԵՍԱՆՅՈՒԹ

Պարտությունից պարտավոր ենք դասեր քաղել, պարտավոր ենք զբաղվել մեր պաշտպանական հզորությունների ավելացմամբ։ «Եռաբլուրում» լրագրողների հետ զրույցում այս մասին նշեց ՀՀ արտաքին գործերի նախարար Արարատ Միրզոյանը։

«Մենք պարտավոր ենք զբաղվել բանակի առողջացմամբ, վերակենդանացմամբ, ինչպես մնացած բոլոր պետական ինստիտուտներով։ Որևէ պետություն այլընտրանք չի կարող ունենալ»,-ասաց Միրզոյանը։

Անդրադառնալով հարցին` ինչպես է վերաբերվում հնչող քննադատություններին, թե հայ-թուրքական հարաբերությունների առնչությամբ ԱԳ վարած քաղաքականությունը պղծում է «Եռաբլուրը», Միրզոյանը պատասխանեց, թե չի ուզում մեկնաբանել ընդդիմության տեսակետները։

«Խնդրում եմ ընդդիմությունից հետաքրքրվեք, թե ինչպես է եղել, որ 1990-ականների վերջերից գրեթե չի եղել որևէ տարի, որ հայ-թուրքական երկխոսության ուղղությամբ որևէ բանակցություն, քննարկում, նամակագրություն չլինի։ Այնպես որ, խնդրում եմ, այդ հեքիաթները դրեք մի կողմ, մի՛ թույլ տվեք, որ իրենց ընդդիմադիր հռչակածները մանիպուլացնեն մարդկանց ու խաբեն»,-ասաց Միրզոյանը՝ ընդգծելով՝ բավական է ապրել խաբկանքի մեջ, քանի որ արհավիրքը, որը եղել է մեզ հետ, մեծ ինքնախաբեության արդյունք է՝ պետք է իրականությանն առերեսվել, ուղիղ խոսել իրար հետ։

Միրզոյանը նշեց, թե պետք չէ նախկինի պես գնալ-բանակցել ու գալ տանը մեկ այլ բան ասել։ Նա վստահեցրեց, որ հայ-թուրքական հարաբերությունների առնչությամբ ինչ ինքը բանակցում է, ամեն ինչի մասին հրապարակային հայտնում են։

Հարցին, թե զոհվածների ծնողներն ասում են՝ ինչպե՞ս կարող ենք թուրքերի հետ կայուն խաղաղության դարաշրջան մտնել, երբ նրանք մեր երեխաներին են սպանել, Միրզոյանն արձագանքեց, թե, իհարկե, ունենք համազգային կարմիր գծեր, որոնք պետք չէ անցնել:

«Մյուս կողմից, մենք առաջին և վերջին պետությունը չենք, որ հարևանի հետ շատ երկար հակամարտություն է ունեցել: ՀՀ կառավարությունը տրամադրված է տարածաշրջանում կայուն և երկարատև խաղաղություն կառուցելուն։

Մենք որքան հիշենք ու հարգենք զոհվածների հիշատակը, այնուամենայնիվ, պարտավոր ենք հոգ տանել ողջերի մասին»,- նշեց ԱԳ նախարարը։

Մանրամասները՝ տեսանյութում: