20.12.2025 | 18:06
Ֆուտզալի միջազգային ընկերական մրցաշարի մասնակիցներից մեկը չի ժամանել Երևան
Գրիգոր Մինասյանն իսկապես իմ ընկերն է. Կարեն Անդրեասյան. ՏԵՍԱՆՅՈՒԹ
Քաղաքականություն
27.01.2022 | 12:06
«Գրիգոր Մինասյանն իսկապես իմ ընկերն է, մենք նաև եղել ենք գործընկերներ։ Քանի որ արդարադատության նախարարի տեղակալի պաշտոնը քաղաքական է, դա վկայում է այն մասին, որ դու ընտրում ես ոչ միայն լավ մասնագետի, այլ նաև վստահելի մեկին, որը քեզ հետ կիսում է գաղափարներդ։ Այդ իմաստով Մինասյանը համապատասխանում է չափանիշներին»,- Կառավարության նիստից հետո լրագրողների հետ ճեպազրույցում այս մասին նշեց արդարադատության նախարար Կարեն Անդրեասյանը՝ համոզմունք հայտնելով, որ արդարադատության նորանշանակ փոխնախարար Գրիգոր Մինասյանը, ով Վատիկանում ՀՀ նախկին դեսպան, Սերժ Սարգսյանի փեսա Միքայել Մինասյանի եղբայրն է, նշանակվել է այդ պաշտոնին, քանի որ համապատասխանել է անհրաժեշտ չափանիշներին։
Ինչ վերաբերում է Մինասյանի անցյալ քաղաքական հայացքներին, ապա Անդրեասյանը վստահեցրեց, որ Մինասյանի քաղաքական հայացքները համընկնում են։
Հարցին, որ եթե Մինասյանն Անդեասյանի ընկերն է, չի ստացվո՞ւմ, որ «բաջանաղապետությունը» շարունակվում է, երբ մարդկանց աշխատանքի են ընդունում ծանոթի միջոցով, նախարարը պատասխանեց, որ «բաջանաղապետությունը» և մնացած բոլոր վատ երևույթները պաշտոնի նշանակելու այն դեպքում է վտանգավոր, երբ քաղաքացիական պաշտոն է, մրցութային, և դու ինչ-որ ծանոթի կամ բարեկամի ես «անցկացնում»։
«Մեկ այլ վատ օրինակ է, երբ քաղաքական պաշտոնի ես նշանակում, բայց իր մասնագիտական արժանիքները չեն բավարարում։ Ես վստահ եմ, որ բոլոր դեպքերում, երբ կան քաղաքական, ընկերական հարաբերություններ, սակայն պահպանված է մասնագիտական որակն ու շահը, նորմալ է նշանակումների համար և բացարձակ ռիսկեր չի պարունակում»,-ասաց Անդրեասյանը։
Մանրամասները՝ տեսանյութում:
