ԵԽ հանձնակատարն Ալիևին կոչ է արել փոխել մարդու իրավունքները խախտող ԶԼՄ-ի մասին նոր օրենքը

Եվրոպայի խորհրդի Մարդու իրավունքների հանձնակատար Դունյա Միյատովիչն Ադրբեջանի նախագահ Իլհամ Ալիևին կոչ է արել լրամշակումների համար խորհրդարան վերադարձնել վերջերս ընդունված «Լրատվամիջոցների մասին» օրենքը։ Այս մասին ասվում է Միյատովիչի՝ Ալիևին ուղղված նամակում, հաղորդում է Meydan TV-ն։

Նամակում Միյատովիչը մտահոգություն է հայտնում, որ նոր օրենքն ընդունվել է առանց լայն ու բովանդակալից քննարկումների։ Նրա կարծիքով՝ նոր օրենքը չի համապատասխանում միջազգային չափանիշներին մարդու իրավունքների, խոսքի ազատության և լրատվամիջոցների ազատության ոլորտներում։ Օրենքը նաև չափազանց կանոնակարգում է ԶԼՄ-ներին և լրագրողի մասնագիտությունը, ինչը հակասում է ազատ, անկախ, առանց գրաքննության լրատվամիջոցների և բազմակարծության սկզբունքներին։

«Նոր ընդունված օրենքն է՛լ ավելի է վատթարացնում խոսքի և ԶԼՄ-ների ազատության իրավիճակը։ Այն պետական իշխանության մարմիններին լիազորում է սահմանափակել լրագրողների աշխատանքը լիցենզավորման միջոցով։ Այն նաև հնարավորություն է տալիս սահմանափակումներ մտցնել լրատվական ընկերությունների և կազմակերպությունների ֆինանսական, իրավական և գործառնական գործունեության վրա»,- ասվում է նամակում։

Հավելենք, որ չնայած լրագրողների ու փորձագետների բազմաթիվ բողոքներին՝ Ադրբեջանի Միլլի Մեջլիսը դեկտեմբերի 30-ին երրորդ ընթերցմամբ ընդունել է աղմուկ հանած օրենքը։ Ադրբեջանցի անկախ լրագրողներն ու փորձագետները նաև օրենքի ընդունման դեմ մի շարք բողոքի ակցիաներ են անցկացրել։

Ադրբեջանի նախագահը նոր օրենքը դեռևս չի ստորագրել։

Էմմա Չոբանյան