«Սա թունավոր ցեխ է». Ռուբիկ Հակոբյանը՝ խորհրդարանի մասին․ ՏԵՍԱՆՅՈՒԹ

ԱԺ Գիտության, կրթության, մշակույթի, սփյուռքի, երիտասարդության և սպորտի հարցերի հանձնաժողովի նիստում Հեռուստատեսության և ռադիոյի հանձնաժողովի անդամի՝ ընդդիմության կողմից առաջադրված թեկնածու Ռուբիկ Հակոբյանի ընտրության հարցի քննարկման ժամանակ իրավիճակը լարվեց, հնչեցին վիրավորանքներ: Ռուբեն Հակոբյանը միջադեպից հետո որոշել է հանել է իր թեկնածությունը: Այս մասին նա հայտարարեց ասուլիսի ժամանակ:

«Երկու օր է՝ հանձնաժողովում քննարկվում է ՀՌՀ անդամի թեկնածուի հարցը, սակայն այս ընթացքում օրակարգային որևէ քննարկում այդպես էլ չեղավ, ամբողջությամբ քաղաքական ուղղվածություն տվեցին հարցին, իրենց հատուկ շեշտադրումներով վիրավորանքներ, հայհոյանքներ, մեղադրանքներ հնչեցրին: Ես եկել էի, որ պատասխանեի այդ մեղադրանքներին և այս երկու օրվա քննարկումները ցույց տվեցին, որ ես պետք է հանեմ իմ թեկնածությունը՝ շնորհակալություն հայտնելով երկու խմբակցություններին։ Չգիտեմ՝ դա լսելի դարձավ, թե ոչ, բայց ես հանեցի իմ թեկնածությունը, ինչը կիսատ մնաց՝ մի քանի մեղադրանքների, վիրավորանքների պատճառով»,- նշեց Հակոբյանը։

Հիշեցնենք, որ Ռուբեն Հակոբյանի թեկնածությունն այս պաշտոնին առաջադրել է «Հայաստան» խմբակցությունը:

Հակոբյանն անդրադարձավ նաև Պետրոս Ղազարյանի հետ կապված միջադեպին, որը տեղի էր ունեցել 2019-ին:

«Խորհրդային Միության ժամանակ այսպիսի բան կար՝ «թունավոր ցեխում» աշխատողներին բոնուս էին տալիս կամ մածուն, կաթ էին տալիս: Ես 4 գումարումների պատգամավոր եմ եղել, և այս օրերին հասկացա, որ սա «թունավոր ցեխ է», հատկապես այդ հանձնաժողովը՝ հանձնաժողովի նախագահի պահվածքով:

Եվ փորձում է ինձ բարոյականության ու էթիկայի գնահատականներ տալ մի մարդ, որը օգոստոսի 25-ին տեսաք, թե ինչ այլանդակ պահվածք ցուցաբերեց:

Գործ ունենք մի թիմի հետ, որն ուղղակի ուսապարկերի համույթ է՝ ինչպես բնութագրել է Վահագն Ալեքսանյանը: Օր առաջ մեր պետությունը, մեր ժողովուրդը այս արհավիրքներից պետք է ազատվի»,- ասաց Հակոբյանը:

Մանրամասները՝ տեսանյութում: