29.07.2026 | 16:30
Շաբաթների ընթացքում ՀԷՑ-ը կառավարության կողմից հանրային գերակա շահ կճանաչվի. Ռոմանոս Պետրոսյան․ ՏԵՍԱՆՅՈՒԹ
Կրեմլն արձագանքել է ՆԱՏՕ-ի՝ Արևելյան Եվրոպայում իր ներկայությունն ավելացնելու մասին հայտարարություններին
Քաղաքականություն
24.01.2022 | 21:54
Զորքերի ավելացման, ուժերն ու միջոցները դեպի արևելյան թև քաշելու մասին ՆԱՏՕ-ի հայտարարություններն ուժեղացնում են անվտանգության ոլորտում լարվածությունը։ Այս մասին հայտարարել է ՌԴ նախագահի խոսնակ Դմիտրի Պեսկովը, գրում է ՏԱՍՍ-ը։
«Ինչ վերաբերում է կոնկրետ գործողություններին, մենք միասին տեսնում ենք հայտարարություն, որը հրապարակում է ՆԱՏՕ-ն՝ զորամիավորման ավելացման և ուժերն ու միջոցներն արևելյան թևում կենտրոնացնելու մասին։ Այս ամենը բերում է լարվածության աճի։ Ես ուզում եմ ուշադրություն հրավիրել, որ այս ամենը տեղի է ունենում ոչ թե այն պատճառով, ինչ անում ենք մենք՝ Ռուսաստանը։ Այս ամենը տեղի է ունենում այն պատճառով, ինչ անում են ՆԱՏՕ-ն և ԱՄՆ-ն, և այն տեղեկատվության հաշվին, ինչը նրանք տարածում են»,- լրագրողների հետ զրույցում ասել է Պեսկովը։
Նրա խոսքով՝ ՆԱՏՕ-ի ակտիվությունը Ռուսաստանի սահմաններին չի կարող անտեսվել ռուս զինվորականների կողմից։
«Նման գործողությունները և ՆԱՏՕ-ի ակտիվության աճը մեր սահմանների մոտ չեն կարող անտեսվել մեր զինվորականների կողմից, որոնք պատասխանատու են մեր երկրի անվտանգության համար»,- ասել է Կրեմլի խոսնակը։
Հավելենք, որ այսօր ՆԱՏՕ-ն հայտարարություն էր տարածել, որ ուժեղացնում է իր ներկայությունն Արևելյան Եվրոպայում։ Մի շարք երկրներ լրացուցիչ նավեր ու ռազմական ինքնաթիռներ են ուղարկում Արևելյան Եվրոպայում տեղակայման վայրեր։
Էմմա Չոբանյան
