Քաղաքականություն
24.01.2022 | 18:33
Հոլանդացի սենատոր Թինի Քոքսը դարձել է Եվրոպայի խորհրդի խորհրդարանական վեհաժողովի (ԵԽԽՎ) նոր նախագահ։ Այս մասին հայտնի է դարձել երկուշաբթի՝ հունվարի 24-ին Ստրասբուրգում ԵԽԽՎ ձմեռային նստաշրջանի առաջին նիստի քվեարկության արդյունքներով, գրում է Korrespondent-ը։
Համագումարի 164 անդամ քվեարկել է Քոքսի օգտին։ Այս ընտրություններում նրա միակ մրցակիցը՝ ԵԽԽՎ-ում ուկրաինական պատվիրակության ղեկավար, «Ժողովրդի ծառա» կուսակցությունից Գերագույն ռադայի պատգամավոր Մարիա Մեզենցևան, ստացել է 80 ձայն։
Թինի Քոքսը Նիդերլանդների սոցիալիստական կուսակցության անդամ է, ԵԽԽՎ-ում Միացյալ եվրոպական ձախերի խմբի ղեկավարը: Նա հաջորդել է բելգիացի սենատոր Հենդրիկ Դամսին։ ԵԽԽՎ ղեկավարն ընտրվում է երկու տարի ժամկետով Վեհաժողովի ներկայացուցիչներից՝ մեկ այլ ժամկետով վերընտրվելու իրավունքով։
Նշենք, որ այսօր ավելի վաղ Ուկրաինան վիճարկել էր ԵԽԽՎ-ում ռուսական պատվիրակության լիազորությունները։ Այս առաջարկին աջակցել են Լատվիան, Լիտվան, Էստոնիան, Վրաստանը և Լեհաստանը։
Տաթև Ֆռանգյան
