Ինչի՞ց էր դժգոհ Արմեն Սարգսյանը․ նախագահը՝ լուսանցքո՞ւմ․ զրույց Դանիել Իոաննիսյանի հետ․ ՏԵՍԱՆՅՈՒԹ

Factor TV-ի հարցազրույցը «Իրազեկ քաղաքացիների միավորում» ՀԿ ծրագրերի ղեկավար, Սահմանադրական փոփոխությունների հանձնաժողովի անդամ Դանիել Իոաննիսյանի հետ

-Պարո՛ն Իոաննիսյան, նախագահը երեկ՝ ոչ աշխատանքային օրով, հայտարարեց հրաժարական տալու մասին։ Նա իր հրաժարականի՝ բավականին ընդարձակ տեքստում բաց հայտարարում է՝ համազգային ճգնաժամի հասցրած քաղաքական իրադարձությունների վրա ինքը չի կարողացել ազդել, որովհետև գործիքներով նախագահին չի օժտել Սահմանադրությունը։ Այսինքն՝ նա դժգոհում էր լիազորություններից։ Քանի որ ստեղծված է Սահմանադրական փոփոխությունների հանձնաժողով, և հնարավոր է՝ նախագահի լիազորությունները լրացվեին, հարց՝ ինչո՞ւ նա չսպասեց մինչ այդ, գուցե լիազորությունները մեծացվեի՞ն։

-Ինձ թվում է՝ սահմանադրական բարեփոխումներն առնվազն երկու տարի տևելու էր, այսինքն՝ մինչև իր լիազորությունների ավարտը։ Բայց եկեք ուրիշ բան հասկանանք, երբ խոսում ենք իր հրաժարականի մասին․ նախ՝ ցանկացած հանրային ծառայող չպետք է զբաղվի բիզնեսով՝ կա՛մ հանրային ծառայող է, և ծառայում է հանրությանը, կա՛մ զբաղվում է բիզնեսով։ Այդ երկուսը չպետք է համատեղվեն, սա պետք է լինի ոսկե կանոն։ Եվ ցանկացած հանրային ծառայողի ծախսերն ու գույքը պետք է բռնեն իր օրինական եկամուտների հետ։ Եթե չի բռնում, ապա ինքը չպետք է լինի հանրային ծառայող, և երկրորդ՝ դա ապօրինի հարստացման հոդվածով նաև քրեական հետապնդման հիմք կարող է հանդիսանալ։ Առավել ևս՝ երբ ինչ-որ հանրային ծառայող որոշում է, որ ինքը գործադիր իշխանության գործառույթներ պիտի վերցնի իր վրա, գնա բանակցի ինչ-որ մեկի հետ, հետո ծանր տանի, որ գործադիր իշխանությունն այդքան էլ համաձայն չէ իր բանակցածի հետ, այդ բանակցածում էլ բիզնես շահեր ունենա կամ չունենա․․․

-Դա ի՞նչ կոնտեքստում եք ասում։

-Արմեն Սարգսյանի կոնտեքստում եմ ասում դա։ Արմեն Սարգսյանը շատ ծանր էր տանում, երբ իրեն ասում էին՝ «ո՛չ, պարոն Սարգսյան, գործադիրի փոխարեն ոչ մի բան մի որոշիր, մի՛ փորձիր գործադիր իշխանության կամքին հակառակ դրսում ինչ-որ բան պայմանավորվել, հետո գալ և ասել՝ պայմանավորվել եմ»։

-Իսկ նախադեպեր կա՞ն, երբ նախագահն առանձին որոշում է ընդունել, որին վարչապետը չի համաձայնվել։ 

-Այո՛։

-Ե՞վ, ի՞նչ կներկայացնեք։

-Եկեք շատ փակագծեր չբացեմ, բայց եղել են, և ինձ թվում է՝ դա ևս պատճառ է հանդիսացել։ Կդժվարանամ ասել՝ որն է պատճառը, իր՝ բիզնեսով զբաղվելն էր, իր՝ բինզեսով զբաղվելու ինֆորմացիայի՝ ջրի երես դուրս գալն էր, ո՞ր մեկն էր վերջին պատճառը։ Բայց այդպիսի պատմություններ շատ են եղել։

Հարցազրույցն ամբողջությամբ՝ տեսանյութում։

Ռոբերտ Անանյան